نظام سامسونج مختلف تمامًا عن آبل،سامسونج بتتعامل مع نظام أندرويد اللي أساسه من جوجل، وبعدين بتيجي تعدل عليه وتحط عليه الواجهة بتاعتها اللي اسمها One UI. يعني التحديث مش جاهز أول ما جوجل تبعته، لأ، بيحتاج شغل وتعريب وتجهيز.
كمان الموديلات عند سامسونج كتير جدًا، وكل موديل ليه نسخ مختلفة حسب الدولة. يعني A73 اللي عندك في مصر مش هو نفس النسخة اللي في السعودية، ومش هو اللي في أمريكا. كل نسخة ليها معالج شكل وشبكة شكل. فلازم يظبطوا التحديث على كل واحدة لوحدها، وده بياخد وقت ومراجعة.
وعلشان كده، سامسونج بتبعت التحديث على دفعات، تبدأ بالدول اللي بيجربوا عليها الأول، ولو التحديث مش عمل مشاكل، تبدأ تبعته لباقي الناس. الموضوع كله احتياطي مش كسل، هما بيحاولوا يتأكدوا إن كل حاجة شغالة صح قبل ما يوصللك.
يعني الموضوع مش تقصير، هو اختلاف نظام شغل. آبل ماشية بسيستم واحد، وسامسونج ماشية بمية سيستم، وبتجرب عالناس اللي قبلنا، علشان التحديث يوصلنا من غير مشاكل.
