البطارية بتنزل بسرعة جدا Galaxy A56

[MohammedMossad]

مساء الخير يا جماعة، أنا معايا سامسونج Galaxy A56 وبقاله كذا أسبوع البطارية بتخلص بسرعة جدًا، حتى مع الاستخدام العادي أو الخفيف. كمان ساعات بلاقي النسبة بتنزل جامد من غير ما أكون بستخدم الموبايل أصلاً، وهو واقف لوحده. بصراحة الموضوع مزعج جدًا، خصوصًا إن الجهاز لسه جديد. جربت كل الحلول اللي اتقالت قبل كده زي تشخيص البطارية من تطبيق Samsung Members، وقفلت التطبيقات اللي بتشتغل في الخلفية، وكمان الجهاز على آخر تحديث – بس المشكلة لسه موجودة. لو في حد يعرف حل أو لو دي مشكلة عامة وفيها تحديث جاي، يا ريت تفيدوني. وشكرًا مقدماً.

[ahmedn5]

غير من today الي since last charge وادخل علي صفحه التفاصيل وابعت سكرين شوت

[cgxv]

انت جربت الجهاز على الوضع الامن لو كده جربه الاول انت تضغط على الباور تكه مطوله بعد كده هتلاقي الوضع

[MAjoK]

اعمل اعادة ضبط مصنع وبإذن الله المشكله هتتحل تماما

[khaled8899]

سلام عليكم حابب اشارككم تجربتي مع a56 فعلا البطارية بتنزل أثناء عدم الاستخدام عملت حاجه ذكية شوية حلتلى جزء من المشكلة تحدثت مع الذكاء الاصطناعي اللى على الموبايل تنبيه لازم تكون متصل بلنت المهم سئلته وجاوبني وشرح لى ان فيه اشياء كثيرة ممكن يكون هى السبب وذكر لى تقريبا ٦ أمور يجب أن اراجعها والاروع من كده انه فتح لى جميل الصفحات ف الاعدادات تدريجيا لاشيك على كل شيئ اهمها غلق تحديد المواقع مادام مش بتستفاد منها وانت نايم وكذالك الواى فاى وبينات الهاتف وبعض التطبيقات مع الوقت الموبايل هيقطرح عليك تحطها ف النوم العميق فمتترددش انك تحطها مادام مش بشغلها كثير لأنها بتستهبل من المعالج وكمان فعل توفير الطاقة عشان يخفض عمل المعالج ومع الوقت انت هتفهم كل حاجه واكرر عشان تفهم وتعالج المشكلة اتكلم مع الذكاء الاصطناعي اقصد Gemini وخليه يفتح لك الصفحات الضرورية اتمنى ان اكون افادتكم اخيرا لفتح جى منى او الذكاء الاصطناعي مرر بيدك من أسفل الشاشة من جهة اليمين أو اليسار إلى أعلى تجاه الوسط كانك هتكتب حرف X ولكن هتبدا من أسفل إلى أعلى خط واحد فقط وبلتوفيق

[gg666]

انا نفس الكلام على فكرة و معايا نفس الموبايل و البطارية بتتسحب بطريقة غريبة مع انى مش مستخدم تقيل للجهاز و لسه عامل مشكلة فى فرع من عندهم و سلمت الموبايل ليهم للفحص و بعد ما اتفحص ٣ مرات حسب كلامهم بيقولوا انه مفهوش مشكلة

[MohammedMossad]

روحت بردو الضمان قالي البطاريه سليمه و مفيهاش مشكله و ان النظام بيستهلك طاقه كبيره