قبل التحديث كان الطبيعى ان أى اشعار يجيلك من أى تطبيق فى الملف الامن يظهر بطريقتين ،على حسب الملف الأمن مفتوح و لا مقفول...
١- لو الملف الأمن مقفول / بيظهر اسم التطبيق إنما محتوى الاشعار بيكون مخفى ( content hidden)
٢- لو الملف الأمن مفتوح / بيظهر اسم التطبيق و بيظهر محتوى الاشعار ( لو رسالة واتس بيبان اسم الشخص و محتوى الرسالة من غير ما تفتح التطبيق)
المشكلة بالتفصيل
فى مشكلة واجهتها بعد التحديث الجديد و لما دورت لقيت ناس كتير بيشتكوا من نفس المشكلة، وهى ان الاشعارات بتبان مخفية خالص حتى لو الملف الأمن مفتوح او العكس بيكون محتواها ظاهر من برا حتى لو الملف الأمن مقفول
لو عاوز الاشعارات تبان زى الاول (مخفية لما الملف الامن يكون مقفول ، و ظاهرة لما الملف الامن يكون مفتوح ) هتعمل الخطوات الجاية دى ..
الحل
(فى البداية هنتعامل ان الموبايل ليه اتنين lock screen :الأصلية اللى برا خالص ،و التانية بتاعة الملف الأمن و اللى بتكون جواها)
١- هنفتح الملف الامن / نضغط على ال ٣ نقط اللى فوق
setting /
notifications and data/
ونتاكد ان show content متفعلة و شغالة
كدا اشعارات الملف الامن هتبان برا عادى.
لسة محتاجين نخلى محتواها مخفى لما يكون الملف الامن مقفول ، و محتواها ظاهر اول ما نفتح الملف الامن ( زى الطبيعى فى الاول خالص قبل التحديث )
هنا فى مشكلة صغيرة و هى انك هتضطر بنفسك تمشى على كل تطبيق و تغير الاعدادت واحدة واحدة و هكذا ..
هناخد الواتس كمثال ..
بعد ما فتحنا الملف الامن ، هنضغط ضغطه مطولة ع الواتس و نختار علامة الi علشان تفتح قايمة app info ومنها ندخل على الاشعارات ونتاكد ان كل الاشعارات متفعلة ( عليها علامة زرقاء ) و نمشى عليهم واحدة واحدة بالترتيب.. هنضغط على الكلام المكتوب ( مش على العلامة الزرقا) ولو التفعيل اتشال نضغط تانى علشان العلامة تبقى متفعلة بالأزرق تانى ، و ننزل ع الاختيار اللى بعده ، نضغط ع الكلام هيفتح صفحة تانية ، ننزل تحت نختار منها lock screen هتبقى معمولة على show content نغيرها احنا ل Hide content و بعدين نرجع خطوة لورا ، و نضغط على الكلام فى الاختيار اللى بعده هيفتح صفحة تانية نعمل فيها نفس الحكاية نختار hide content و هكذا فى كل الاشعارات بالترتيب واحدة واحدة لحد اخر واحدة فى الصفحة تحت
ملحوظة: فى كلام هتضغط عليه هيلغى تفعيل الاشعارات ، هتضغط عليه تانى علشان ترجع التفعيل ،و تنزل تجرب فى اللى تحته وهكذا ( المهم متفوتش اختيار بدون ما تجربه و متسيبش اختيار مش متفعل بالعلامة الزرقا) ...
وكدا يبقى اشعارات الواتس اتظبطت ، و تكرر نفس الخطوات فى كل التطبيقات التانية فى الملف الامن اللى عاوز اشعاراتها تظهر برا ... للأسف الطريقة طويلة و مملة بس دا الحل الوحيد اللى نفع معايا🤷♂️ ، قولت اكتبه بصيغة سهلة تفيد كل الناس اللى بتسأل ع الحل.
