-طبعا مشكلة التطبيع للي ميعرفش هيا مشكلة مشهورة جدا في الشاشات الأموليد أو الأوليد بشكل عام وان كانت الشاشات الحالية بتعاني منها بشكل أقل عن زمان وده نتيجة ان الشركات المصنعة تداركت المشكلة وبتشتغل على تقليلها ولكن لا تزال مشكلة موجودة ووارد انها تحصل لأي حد بيستخدم موبايل بشاشة أموليد.
-التطبيع عبارة عن ان بعض العناصر او المحتوى اللي بيكون ظاهر او شغال على الشاشة لفترة طويلة وخصوصا لو في سطوع عالي بتفضل العناصر دي او الاشكال ظاهرة على الشاشة وكأنها اتطبعت او اتحفرت على الشاشة حتى بعد ما تخرج منها وتفتح اي حاجة تاني.
-طبعا زي ما قولت السبب الرئيسي في حدوث المشكلة هو انك تشغل اي محتوى على الموبايل ثابت لفترة طويلة وعلى سطوع شاشة عالي ومع التكرار المشكلة هتزيد اكتر وبتكون حاجة مزعجة جدا الحقيقة (بالنسبالي على الأقل شخصيا).
طيب ايه اللي ممكن نعمله عشان نحمي شاشات موبايلاتنا الأموليد من المشكلة دي؟
١- دايما فعل وضع الدارك مود.
٢- استخدم شاشة الموبايل على أقل سطوع يكون مريح بالنسبالك.
٣- فعل خاصية الخفت او extra dim.
٤- تجنب بقدر الامكان استخدام شاشة الموبايل تحت أشعة الشمس المباشرة.
٥-فيه بقى خاصية جميلة في الموبايل اسمها App pinning والحقيقة ان الخاصية معناها انك بتثبت التطبيق اللي بتستعمله على شاشة الموبايل ومتقدرش تخرج منه او تنزل حتى ستارة الاشعارات الا بالخروج من وضع الpinning واللي بيتم بسحب مطول من تحت الشاشة لفوق...
*هتقولي بقى ايه علاقة الموضوع ده بالمشكلة بتاعتنا؟ هقولك ان من اكتر الحاجات اللي بتطبع في الشاشة هيا شريط اللي فوق اللي باين فيه البطارية والساعة لانهم طول الوقت بيبقوا ظاهرين لكن الخاصية دي بقى بتخفي شريط الحالة وبالتالي انا دايما بحب افعلها لو عارف اني هستخدم تطبيق لفترة طويلة.
٦- حاول تستخدم التطبيقات في وضع الشاشة الكاملة او fullscreen mode اذا كان التطبيق يدعم ده.
