Original topic:

الصلاة

(Topic created on: 01-05-2022 05:17 PM)
194 Views
Khadijasalih
Active Level 4
Options
اخرى
هقولك ع شويه تفاصيل كده تخليك تحب الصلاه وتوصل لدرجه الخشوع وتنتظم فيها لأنها هي الأساس اللي هتخلي مزاجك كويس ونفسيتك مطمئنه...

امشي بمبدأ انها صلاتك مش حاجه روتينيه و مُجبر تعملها .. لأ بالعكس انت بتكون رايح تقعد مع ربك شويه 
و هتقعد معاه خمس دقايق بس فى كل فرض .. كتير على اللي أنعم عليك بكل حاجه؟ 
قبل كل فرض استعد للصلاة و كأنك رايح تقابل حد بتحبه جداً 
روح و أنت ملهوف .. 
و أول ما ترفع إيدك وتقول : الله اكبر.. ابتسم ابتسامة مشتاق .. قولها وجواك صوت بيقول ( جيتلك يارب يا حبيبي وقفت بين ايديك).. انسى الدنيا كلها بمشاكلها و همومها فى اللحظه دى
أقرأ الفاتحة بكل راحة واسمع جواب ربك بعد كل اية .. و متقولهاش بسرعه و كأن حد بيجرى وراك 💜
و فى الاعتدال من الركوع لما تقول " سمع الله لمن حمده "
احمده انت بطريقتك .. قول" الحمدلله يارب على كل النعم اللي اديتهالى" , " الحمدلله حمداً طيباً مباركاً كما ينبغي لجلال وجهك ولعظيم سلطانك " :

و اول ما توصل للسجود افتكر انه أقرب ما يكون العبد لربه وهو ساجد .. لما تهمس ببطن الأرض و بيسمعك من في السماء... سبح ربك و ابدأ احكيله كل اللى ف قلبك قول يارب انا بحبك .. (يارب خليك معايا فى المحنه دى) .. ( يارب انا تايه وجهنى للطريق الصحيح ) .. ( يارب انا محتار فى الموضوع الفلانى ساعدنى ) .. احكي وفضفض لإن محدش هيفهمك ولا هيحس بيك زى اللي خلقك 
لما تحكي معاه مش هتلاقى حواجز بينك و بينه .. و احكي بالعامية مش لازم لغه عربيه فصحى يعنى 😊 .. هو اعلم بحالك منك بس بيحب يسمع صوتك 😀.. يمكن تتلخبط فى كلامك بس هو فاهم انت عاوز تقول ايه .. و صدقنى مهما كانت مشكلتك كبيرة و صعبه .. فى آخر كلامك هتحس براحه مش طبيعيه و هتبتسم لانك سلمت امرك لرب العباد 😀
و بعد ما تخلص صلاة .. سلم عليه بس مش السلام التقليدي 
لانك دلوقتى بتسلم على حبيبك .. تخيل انك بـ تقول ( هيوحشنى الكلام معاك يارب امتى تيجي الصلاة الجاية عشان أرجع اقعد معاك تانى لسة في كلام كتير فى قلبي حابب احكيلك عليه ) 
صدقنى اول ما تخلص صلاه هتحس بعدها انه مفيش حد قدك فى الدنيا.. مش تكبر وغرور ، لكن راحة وطمأنينة لانك كنت قاعد مع ربك .. مع حبيبك.. وسلمتله امرك وتوكلت عليه ولانه لما تواجهك اي مشكلة فى يومك مش هتهز شعره منك .. عارف ليه ؟!
لانك هتروح فى الصلاة اللي بعدها و تحكي لربك وتطلب منه يساعدك 😀
و يا بخت اللى يعرف معنى الوصال مع رب العالمين .. ربنا يرزقنا و اياكم الثبات والخشوع فى الصلاة. ❤️

ربنا يجبر بخاطركم يارب ❤️
17 Comments
mohamedmido
Active Level 10
اخرى
اللهم امين انا وحضرتك
Ra7ma3ssam
Active Level 1
اخرى
حبيبتي جزيت خيرا رفعت قدرا
Khadijasalih
Active Level 4
اخرى
امين يا رب ربنا يجازى حضرتك الفردوس الاعلى
Ra7ma3ssam
Active Level 1
اخرى
واياكي حبيبتي اللهم امين
mohamedmido
Active Level 10
اخرى
يا اخي الكريم استغفر ربك عن اللي قلتو ده انا مش هقولك اني مش بشتم ولا حاجه لكن قدر المستطاع بحاول اتجنب ده ولو وقعت بستغفر اللي عملتو وقولتو ده عاقبه كبير لانك شتمتها و الرسول صل الله عليه وسلم قال أوصيكم بالنساء خيرا هي قلت كلام مهم واكيد كلنا عارفين ان ده مش فيس بس علي الاقل نشرت هي حاجه مفيده احسن من اللي بنشوفو هنا ولاحظ حتي ان في بنات هنا ممكن يشوفو الشتيمه ده لو اختك مش هترضي حد يشتمها او امك او خالتك او عمتك الخ
فستغفر ربك و ارجو منك انك تتاسف لها قبل فوات الأوان وربنا يهديك ويهدينا
mohamedmido
Active Level 10
اخرى
وحتي لو هي او غيره بينشر هنا وخلاص خليها تعمل كده
جاهروا بالطاعات.. فقد سئمنا المجاهرة بالمعاصي.
Khadijasalih
Active Level 4
اخرى
بجد شكرا لكلام حضرتك انا معرفش هو كتب ايه لانى كنت قافلة الابليكيشن بس اكيد هو قال حاجة مش كويسة وشكرا على الرد فى غيابى
0 Likes
mohamedmido
Active Level 10
اخرى
حضرتك احنا مش مليكه انا او غيري لان في ناس هنا برضو ربنا يجزيه كل خير دافعو برضو و الرسول قال هذا الحديث  من رد عن عرض أخيه في الغيب رد الله عن وجهه النار يوم القيامة والله اعلم
لكن عيب اللي بيحصل ده واتمني ان ربنا يغفرله و يهديه ويهدينا يارب
0 Likes