ناس كتير بعد تغيير سياسة الخصوصية الخاصة ب WhatsApp، سابته و راحو يدورو على تطبيقات بديلة " أكثر أمانا " و خصوصية...
طب هو السؤال ، هى مش كتير من الناس دلوقت عندهم Facebook و بيستخدمو ال FB messenger ؟!!
مع العلم إن الاتنين تقريبا مفيهوش و لا أمان ولا خصوصية و لا أى حاجة !!!!
إشمعنى واتساب بس إلى الناس قلقت منه ؟!!! علما بأن Facebook هى نفسها مالكة تطبيق WhatsApp، و إلى دفعت فيه 19 مليار دولار حسب علمى ، و بقى مجانى فى كل حتة بعد ما كان باشتراك شهرى فى بعض الدول ، كل ده لله فى لله يا ترى ؟!!
هما بيحبونا للدرجة دى ؟!!
ده أنا يمكن أهلى معرفوش عليا فى عمرهم كله ١٠٠ ألف جنيه على بعض 😁 ..
أكيد هما مستفيدين من الموضوع ده ... ولا إيه ؟!
من سنين فاتت أيام yahoo و smn و غيرهم و يمكن حتى WhatsApp نفسه حسب ما أفتكر ، و لا كان فيه تشفير و لا خصوصية و مكنش فى دماغ حد الكلام ده لأنه ببساطة ميعرفهوش أصلا ...
و كانت الناس بتستخدم البرامج دى عادى و الناس ساكتة...
أنا شخصيا لأنى زيى زى أى حد ميحبش أن كل بياناته و مراسلاته تبقى مكشوفة ، و تستغل لأيا كانت الأسباب ، قفلت Facebook و تويتر خالص بقى لى كذا سنة ، و كنت بستخدم Google hangouts مع شخص أو اتنين إلى بتواصل معهم لأسباب بسيطة ، و هى إن التطبيق كان مثبت بشكل إفتراضى على الجهاز ، و على معظم أجهزة أندرويد وقتها، و فى نفس الوقت هو تبع جوجل ، إلى هى نفسها عاملة أندرويد و بستخدم تطبيقات تانية لها على الجهاز ، يعنى كده كده ممكن تكون بياناتى عندهم أصلا حتى من غير hangouts، فطالما الموضوع كده فمش هتفرق ... لكن للأسف Google محاولتش إنها تطور التطبيق و تحسنه عشان الناس تستخدمه و يبقى تطبيق منافس ، لأن الناس أصلا محاولوش يستخدموه ( فى ناس فى دول تانية بتستخدمه عادى ) ...
و أستخدمت WhatsApp لفترة لا بأس بها ، لكن طول الفترة مكنتش مرتاح لفكرة إنه تابع ل Facebook بتاريخها فى إنتهاك خصوصية المستخدمين أكتر من مرة و برغم كده الناس فضلت تستخدم Facebook عادى و لا كأن في حاجة ...
فكانت النتيجة أنى مسحت واتساب من عندى من كم شهر فاتو و نزلت مكانه تطبيق Telegram على أعتبار إنه آمن عن واتساب .... و إن كنت مش مصدق أوى يعنى .... بس ما علينا ...
و لاقيت من بعض المواقع ( بفضل مشكلة واتساب بتاعت اليومين دول ) ، أن Telegram أتعرض قبل كده لإنتقادات بسبب الأمان و الخصوصية فيه، و إنه مش آمن بالدرجة إلى بيروجو بها للتطبيق!!!
رجعت قلت لنفسى ، طب و هو إيه آمن أصلا، حتى شركة Apple نع كل حرصها على خصوصية مستخدميها ، إتعرضت قبل كده للإختراق ، و أتسرب وقتها صور خاصة و معلومات حساسة عن بعض المشاهير لو حد فاكر ...
خلاصة الكلام ، إنى أشك أن فى تطبيق أو خدمة على الإنترنت آمنة بنسبة ١٠٠ % ....
جربو تطبيقات تانية، الدنيا موقفتش على WhatsApp، هو مش منزل من السما ، و عادى جدا أن ييجى وقت و يظهر تطبيق أو خدمة تانية أقوى منه تشيله، و الناس تنساه مع الأيام ، زى ما حصل قبل كده مع تطبيقات تانية كتير و كانت ناجحة جدا فى وقتها برده .....
بصراحه اجمل مقال شوفته من سنين تسلم علي توضيح وجهه نظرك وانا متفق معاك في كل حاجه خاصتا في جزء ان اي حاجه اون لاين يبقي مفيش امان مهما كان مستوي امان عندك 👌👌👌👌
هو كلامك تقريبا سليم بس اصلا كل التغيير اللي عمله واتس اب هو انه خلى الرسايل البيزنيس بتاعتك الاي بتبعتها للشركات زي لما تكلم سامسونج على الواتس مكشوفة عشان يقدرو يعرفو ايه المنتج اللي انت بتقضله ويجيبولك ليه اعلانات على الفيس بوك عشان يكسبو فلوس اكتر لكن الرسايل اللي بتبعتها لصحابك مثلا دي مشفرة ولحد دلوقتي واتس اب متقدرش تعرف ايه اللي جوا الرسايل دي ومتقدرش تقراها لانها بتكون مشفرة
