خواہشوں سے بھرا دل کا آنگن مرا
خواب رنگوں بھرے میری آنکھوں میں تھے
ایک شب مجھ کو اذن رہائی ملا
کہکشاں سے پرے میں نے تارے چنے
مجھ کو بارش میں پھولوں نے آواز دی
میں نے ساون جئیے خوشبوؤں سے بھرے
خوش نصیبی مری اوج کو چھو گئی
جیسے خوشیوں کی جنت میں رکھا قدم
روشنی سے بھی روشن تھیں راتیں مری
ساری صبحیں اجالوں سے اجلی رہیں
مجھ سے غلطی ہوئی تھی سمجھنے میں ہی
بھول بیٹھی تھی میں نیند میں خواب کی
آنکھ کھلنے تلک رات سے صبح تک
ایک مدت بھی ہے جو رقم ہو چکی
جو تھا اذنِ رہائی وہ پورا ہوا
چیختی رہ گئی ان کہی داستاں
ادھ کھلی آنکھ میں خواب مرنے لگے
روشنی رنگ سارے خفا ہو گئے
میرے اپنے ہی میرے خدا ہو گئے
مجھ کو جنت ملی اور نہ دوزخ ملی
سالہا سال برزخ میں جلتی رہی
رک گئی زندگی سانس چلتی رہی
جب نہ کوئی رہا میرا اپنے سوا
میری تنہائیاں میری ساتھی بنیں
میں نے خاموشیوں سے تکلم کیا
خواہشوں کو جلایا بجھا بھی دیا
راکھ خوابوں کی کمرے میں اڑنے لگی
میں نے خود کاٹ ڈالا پروں کو بھی جب
کیا الگ تھا سماں عکس روشن نما
تال پر بیڑیوں کی تماشہ ہوا
روح رقصاں ہوئی دھڑکنوں کے تلے
زندگی چل پڑی موڑ مڑنے لگی
میرے اندر ہی دنیا بسا دی گئی
میری ہستی پہ مستی چڑھا دی گئی
میرے ہوش و خرد جب تھے یکجا ہوئے
میرے منصف کے ہاتھوں میں جنبش ہوئی
مجھ کو اذنِ رہائی دوبارہ ہوا
فیصلہ کر کے پھر اس نے توڑا قلم
تیرے ہر فیصلے پر ہے سر میرا خم
ہاں مگر میرے پر ۔۔۔۔۔
ہاں مگر میرے پر۔۔۔
