اللي طلع على السلم غير اللي طلع في الاسانسير
الجملة دي استوقفتني لما سمعتها من كام يوم طبقها كده على حياتك و تجاربك اللي مرت عليها
فعلا الألم اللي عانيته في حل مشكلة معينة شبه طلوع السلم إنت بتعافر كتير و بتبذل مجهود كبير
عشان كده بتجاهد تحافظ على النتايج اللي وصلتلها
أما لو حتركب الاسانسير يعني لو استمعت لنصائح الآخرين في حل المشكلة حتوصل طبعا لنتيجة ؛ النتيجة دي معرضة لعوامل مؤثرة كتير
يعني لو النصيحة اللي اتقدمت لك كانت من شخصية كويسة ذات مبادئ و عندها ضمير فكده إنت ركبت الاسانسير السليم حيوصلك و إنت مرتاح
أما النصيحة لو جاتلك من خبثاء النوايا فوقتها حتكون ركبت الاسانسير الغلط و إنت و حظك يا عطل بيك و اتحبست جوا مشكلتك يا الحبل اتقطع و نزلت اتهبدت و اتأذيت
فلو حتركب الاسانسير شوف اللي حتاخد منه النصيحة
