شريط الذكريات ساندوتـشات المدرسة علمتنى أكبر درس فى حياتى !! زمان وأنا فى ابتدائى ، أمى كانت لازم تخلينى أفطر كويس قوى قبل ما أنزل من البيت ، و ده كان مشكلة كبيرة ليا اتعلمت بسببها أعظم درس فى حياتى .. ساعة الفسحة ، كنت ألاقى زميلى اللى جنبى بيطلع ساندوتشاته و بياكلها و هو مستمتع بيها جدا جداً .. وأنا أطلع ساندوتشاتى ألاقيها بارده و مالهاش طعم وماتفتحش النفس ، أقوم شايلها زى ماهى فى الشنطة وأقعد مضايق .. و فضلت على الحال ده كتير .. لغاية ما فى يوم جات مدرسة مستحيل أنساها ، كانت بتتكلم مع كل واحد فينا كأننا كبار ، و دايماً مبتسمة ، و بتعاملنا زى ما تكون أم لكل طفل فى الفصل .. المهم فى يوم كنت قاعد فى الفسحة متضايق و شافتنى المدرسة دى .. جات وقالتلى مالك قاعد لوحدك ليه ؟؟ أنت مامعكش ساندوتشات تاكلها زى زميلك اللى جنبك ؟؟ قولتلها معايا بس أنا ساندوتشاتى مش حلوة زى ساندوتشاته .. قامت المدرسة قالتلى يعنى أنت نفسك تبدل مع زميلك .. بصيت لها بكل سعادة و أنا بقولها يا ريت .. قالتلى ماشى .. راحت المدرسة و أقنعت زميلى أنه يبدل معايا ساندوتشاته .. بالفعل زميلى وافق .. لكن ساعتها حصلت حاجة غريبة .. لما جيت أكلت ساندوتشات زميلى ، لاقيتها عادية بردو و مالهاش طعم ، مش زى ما كنت فاكر .. المدرسة لما لاقيتنى سيبت السندوتشات تانى .. قالتلى : أنا حبيت أثبتلك إن العيب مش فى الساندوتشات اللى معاك .. العيب جواك أنت .. طول ما أنت شبعان .. مستحيل تحس بنعمة الساندوتش اللى معاك .. و تلاقى متعة لما تاكله .. زميلك عشان بياكل وهو جعان فعلا .. بيلاقى الأكل حلو جدا .. و أنت بتلاحظ إنه مستمتع قوى بأكله عزيزى .. مستحيل تحس بقيمة النعمة اللى معاك طول ما أنت مش حاسس بقيمتها .. هاتفضل طول حياتك عايش فى تعاسة .. و فاكر إن كل الناس معاهم حاجات أحسن منك .. و أنت الوحيد المظلوم .. و تعيش فى عتاب شديد مع ربنا و فاكر إنه ظالمك .. صدقنى لو بدلت حياتك مع حد .. ساعتها هاتحسده على النعم اللى أنت كنت فيها .. لأننا بنعرف قيمة النعم اللى معانا لما نتحرم منها .. أنت غـنى .. باللى معاك ..❤️ ما تستصغروش النعم اللي في إيديكم علشان لو راحت منكم إحتمال كبير ما تعرفوش تعوضوها و لا ترجعوها تاني . نعمة الرضا بالمقسوم في حد ذاتها نعمة كبيرة ، ربنا بينعم بيها على الناس اللي هو راضي عنهم ، و أسوأ عقاب من ربنا إنه يرزقك نعم كتيرة و يفقدك نعمة الإحساس بيها و استشعار قيمتها ، فتفضل طول عمرك مغموم و مكروب و في نفس الوقت محسود عليها و أنت أصلا مش مستمتع بيها ، أو ربنا يغضب عليك و تروح منك ، و ساعتها فقط حتحس بقيمة اللي كان عندك و ضاع منك .
قال تعالي : " وَإِذْ تَأَذَّنَ رَبُّكُمْ لَئِن شَكَرْتُمْ لَأَزِيدَنَّكُمْ ۖ وَلَئِن كَفَرْتُمْ إِنَّ عَذَابِي لَشَدِيدٌ " ( سورة إبراهيم - 7 ) .
🤲🤲🤲🤲🤲🤲 الحمد لله رب العالمين ، حمداً كثيراً طيباً🙏 مباركاً فيه
