- مين بيلحن لك ؟؟
= اللي بيلحن لي ملحنين شبان كويسين جدا وانا ..
- انت بتلحن شغلك ؟!!
= اه ..
- طب انا مش عارف !
= فيه حاجة اسمها ان حضرتك زي ما بتسمع مثلا أي حد تيجي مثلا من باب العلم بالشيء بتفتح الكاسيت بتسمعني بتعجبك أغنية فمن باب الفضول تشوف مين اللي ملحنها !
- يا استاذ عمرو ما هو انا بسمعك وانت بتغني ميال ، انت بتبسطني لكن لا تطربني ..
= ما هو انا مش مفروض ان انا احط في دماغي اني اطرب حضرتك واطرب ده وده ، افرض حضرتك ان انا مش عاجبك هعمل ايه ؟!
- انا عايز اقول ان فنك فن غناء وليس فن طرب ، التطريب أمر اخر ومجموعة الشبان الحاليين يسمعهم الناس ربما بأيديهم وأرجلهم وليس بأذنهم ، هل وانا بسمع عمرو دياب او علاء عبدالخالق او محمد فؤاد او أي حد من الجيل ده هل تعتقد ان انا بقعد على كرسي واستمتع بهذا الغناء ؟!
= ما احنا مش عايزين ده ، مش عايزين حضرتك تقعد .. - اُمال عايزني أقوم ارقص ؟!!
= مش ترقص ، بس لازم مشاركة بأي حاجة تسقف او تعمل أي حاجة انما حتة انك تقعد كده على كرسي وتقول "الله ، الله ، الله" لا مش عايزين ..
طبعا بعد الحوار ده تم إتهام عمرو دياب بإساءة الأدب ضد الإعلامي مفيد فوزي رغم إن أسلوبه مستفز جدا
يا ترى رأيه إيه في المهرجانات اللي مسحت مخ الجيل الجديد ؟
