اللي بيحصل معاك ده سببه يا إما الشاحن نفسه مش مظبوط، يا إما السوكت بتاع الموبايل فيه لعبة خفيفة. لو الشاحن سامسونج حقيقي، مش المفروض يعمل الحركة دي خالص، الشاحن الأصلي بيشتغل ثابت ومن أول لمسة، مفيهوش هزار.
فيه شواحن في السوق شكلها سامسونج وبيجوا في علبة متقفلة وكابل تخين وكل حاجة، بس لما تجربهم تلاقيهم بيفصلوا ويرجعوا، أو بيشحن ببطء، أو يوم يشتغل ويوم يزوغ. دول مضروب أو تجميع مش أصلي.
كمان خلي بالك، لو السوكيت بتاع الموبايل فيه تراب بسيط أو مش نضيف، هيخلي التوصيل مش ثابت. حركة بسيطة زي تنظيفه بفرشة ناعمة ممكن تظبط الدنيا، بس بلاش دبوس ولا أي حاجة معدنية، عشان متبوظش الدنيا أكتر.
لو حابب تتأكد، جرب نفس الشاحن على موبايل تاني من نفس الفئة، أو جرب شاحن تاني مضمون على موبايلك. لو لقيت إن المشكلة راحت، يبقى العيب من الشاحن اللي معاك.
لو لسه مستمر، ساعتها الموضوع يا في السوكيت يا في النظام، ودي سهل تتظبط في الضمان.
اللي بيقولك "روّح الصيانة على طول" من أول مرة، ده مش فاهم. جرب كده بهدوء الأول، وشوف إيه اللي بيكرر المشكلة، واشتغل على ده.
