مشكله بشحن هاتف S22 Ultra

[Bmaloufi]

السلام عليكم ومبارك عليكم الشهر الفضيل

اعاني من مشكله شحن الجوال من تقريبا اكثر من سته شهور ، مشكلته اذا وصل 5% ما اقدر الحق اشحنه ويطفي ، وهنا تجي المشكله الي مالقيت لها تفسير وهي لما اشبكه بالشاحن 45W بس اشوف علامه الشحن بدون اي نسبه مئوية واخليه لفترات طويله واحاول اشغله مايرضى ، دخلت اليوتيوب ودورت حل للمشكله والكثير يقول خليه يشحن لمده نصف ساعه وبعدين يبدأ يشحن معاك واللي يقول نظف السوكت وحاولت فيها كلها ولا ضبطت معاي بس لقيت لي حل مؤقت وهو اني اشبكه بشاحن سريع عادي او اشحنه لاسلكي مايخذ دقيقه الا يبدا يشحن ومن تطلع لي النسبه المئويه واحد بالميه والدائرة خضرا اغير الشاحن لل 45W وتقلب الدائرة لونها ازرق علشان الشحن السوبر فاست وفعلا مايطول ويشحن فل ويقعد معاي الى اليوم الثاني وصرت كل ما قرب للعشرين بالميه اعلنت حاله الطواري علشان ما ابلش فيه .

انتظرت لين ينزل تحديث 6 علشان افرمته مره وحده وفعلا نزل وحدثت الجهاز وفرمته بعد التحديث مباشره عن طريق الجهاز نفسه بس برضو ماحل لي المشكله لاحظت كمان اني لما اشبكه بجهاز كمبيوتر مايتعرف عليه نهائيا بس يشحن سريع عادي فقط ولما اشبكه بشاحن السياره يقول لي الشحن بطيء وتأكد من السلك والشحن راح ياخذ 30 ساعه على بال مايفلل بينما اشحن جهازي الثاني الي هو 20 Ultra يشحن شحن سريع ومافيه اي مشكله.

الحلول الي جربتها 

- نظفت السوكيت بكل حذر وزي ما هو مشروح بكم فيديو على اليوتيوب.

- اشتريت كم شاحن وكيبل اصلي من جرير ونفس الكلام.

- لعبت بالاعدادت حقت المطورين وغيرت نمط ال USB وسويتها عن طريق الكود "ناسي رقمه الي يبدا ب * وينتهي # وتطلع لي قائمه غير الي بالاعدادت خياراته اكثر" بس برضو مافيه فايده.

- طفيت خاصيه الشحن السريع وشغلت السوبر وسويت العكس وخربطت وما فيه فايده.

الجهاز كأستهلاك بطاريه يعتبر ممتاز جدا بس مشكلته اذا وصل 5% انهبل

وهل تتوقعون اذا فرمته عن طريق الاودين Odin راح يضبط معاي ؟

تكفون الي عنده حل "وده للصيانه" مايحتاج يرد علي لاني راح اتحمل الجهاز زي ماهو ولا اوديه للصيانه .

شاكر لكم تعاونكم

[s3dkss]

استخدم شاحن اصلي يكون معتمد من سامسونج نصيحة ولا تستخدم الجوال وهو يشحن لانه هذا اكثر شي يدمر عليك الشحن والبطارية

[Bmaloufi]

استخدمت شاحن سامسونج الاصلي والكيبل حقه واشتريت نوعين معتمده وكلها نفس الكلام يعني اذا الجهاز شغال تشحن سريع بدون اي مشكله لكن الكمبيوتر للاسف مايتعرف واذا طفى الجوال فرصه سعيده لازم اشوف لي شاحن عادي ولا لاسلكي وبخصوص استخدامي وهو يشحن ما استخدمه الا للضرورة القصوى فقط.

[s3dkss]

طيب وديه صيانة عند سامسونج ممكن تحتاج تغير البطارية او شوف لك اقرب محل يشيك عليه بس

[Bmaloufi]

شاكر اهتماك بس زي ما انا كاتب بالموضوع البطاريه ممكن تقعد معاي يومين ولا شايف فيها اي مشكله وانا عندي احساس قوي ان المشكله بالفريموير واحتمال كبير تضبط بالاودين بس بشوف اذا احد جرب الطريقه ذي ومشى الحال معاه.
والله يخليكم انا صادق يوم اقول عادي اتحمل الجهاز زي ماهو ولا اوديه صيانه.

[s3dkss]

فيه خدمة اسمها وضع الصيانة جربها وشوف ممكن تزبط معك

[Bmaloufi]

خلاص ضربت الجوال بالجدار ما عاد ابغى شي

[s3dkss]

تمام وتقبل مروري شكله ازعجتك👍

[Bmaloufi]

قدرت لك اهتمامك وعارف انك تبغى تساعد بس كل حلولك تكلمت عنها بالموضوع وحلك الاخير بعد حق وضع الصيانه مو مشكلتي نهائيا ولا قلت اني ما ابغى اوديه الصيانه علشان مايسرقون بياناتي.

انا مافصلت الموضوع وذكرت كل كبيره وصغيره علشان تعطيني نفس الحلول

[brmal]

الحل بسيط اشحنه قبل يوصل 5% واساسأ شركات الهواتف توصي بشحن البطارية على 20% للحفاظ على قدرتها