شريط أبيض أسفل الشاشة بعد التحديث

[ahmedazzam204]

السلام عليكم

من فضلكم أنا معايا موبايل S20plus و مؤخراً ظهرت فيه مشاكل غريبة و متتالية و مش عارف أحلها
الموبايل معايا بقاله 11 شهر (فاضل حوالي 3 أسابيع في الضمان) و بعد ال software update بتاع شهر 8 august security) patch) لقيت إن ألوان الشاشة مش مظبوطة و كأن فيه filter أخضر علي الشاشة بالكامل و خصوصًا في حالات الإضاءة الضعيفة
المشكلة كانت غريبة جداً لأني أول مرة أتعرضلها مع العلم أن كل أجهزتي السابقة كانت من سامسونج و فضلت المشكلة موجودة و الغريب أنها كانت بتروح و تيجي كل شوية و أنا معرفش السبب لحد ما عملت ال software update بتاع شهر 9 September) security patch) و كنت فاكر إنه هيحل المشكلة لكن للأسف الوضع أصبح أسوء بمراحل و المشكلة بقت أوضح و كان بيحصل حاجات غريبة كمان زي إن الشاشة ألوانها تتهز أو تتحول للأبيض الباهت أو الأخضر و ترجع تاني لوحدها و هكذا
و فوجئت النهاردة الصبح أن الألوان الخضرا مبقتش موجودة لكن للأسف فيه مشكلة أكبر و هي أن فيه شريط أبيض ظهر بعرض الشاشة من تحت خالص و ساطع جداً جداً في كل الاوضاع حتي لما بقلل الإضاءة بيفضل زي ما هو أو لما أحط الموبايل في الشاحن و كمان فيه اهتزاز في الشاشة بيحصل كل شوية وأنا فاتحها
أنا كنت جربت أكتر من حل لمشكلة الألوان الخضرا بعد ما دورت و كلها منفعتش و جربت تاني بعد مشكلة الشريط الأبيض لكن مفيش أي فايدة للأسف زي إني أعمل restart أو force restart أو أقفل الadaptive brightness و ال blue light filter و أقلل ال refresh rate ل 60Hz لكن كل ده منفعش معايا للأسف الشديد و ما زالت المشكلة مستمرة و مزعجة جداً جداً في استعمال الموبايل لأن الشريط الأبيض منور جداً و بيضايق العين أثناء الاستعمال
كنت روحت فرع سامسونج في مول العرب من يومين بخصوص مشكلة الألوان الخضرا و قالي إنه سوء استخدام و المفروض أغير الشاشة و أتحمل تكلفتها اللي هي 4450 جنيه!! طبعاً ده مرفوض جداً بالنسبالي لأن الموبايل كان شغال معايا زي الفل قبل ال updates بدون أي مشاكل و فجأة ظهرت كل المشاكل و انقلب الوضع تماماً و المفروض أن الجهاز لسه في الضمان يعني مش أنا اللي أتحمل تكلفة مشكلة زي دي ده لو افترضنا أن المشكلة في الشاشة أصلا مش في ال software لأنه كان واضح جداً ارتباطها بال updates كمان فيه حل قريته و هو ال Factory reset لكن بعد ما دورت و سألت كتير لقيت إنه مش بينفع مع أي حد ف معملتوش
لاحظت كمان أن الجهاز بيسخن أكتر و أسرع من الأول بكتير قبل ما أعمل ال update حتي لو استعملته لفترات قصيرة في جو معتدل و أخشي أن ده يأثر علي الأداء أو البطارية و غيرهم
كمان بعد ما دورت علي ال youtube و سألت ناس عرفت أن الموضوع منتشر و كل الناس ربطته ب software updates سواء ده أو updates قديمة و سمعت أنها مشكلة مرتبطة بسلسلة S20 وخصوصًا نسخة ال Exynos
أرجو الرد و الاستجابة لحل مشكلتي في أسرع وقت ممكن و شكراً

[ahmedazzam204]

..

[AbdelsattarAli]

حاول ترجع للاصدار القديم من السوفت وير وانتظر اصدار يكون احدث من اللى معاك حاليا

[ahmedazzam204]

مينفعش أرجع لاصدار قديم

[iPro]

اعتقد ان المشكلة دي hardware
مش software
وسبب حدوثها بعد التحديث ممكن يكون بسبب ثبات الشاشة على صورة ثابته فترة طويلة اثناء التحديث (لوجو الأندرويد والخلفية الزرقاء) بإضاءة مرتفعة.
صعب جدا يكون فيه flicker او burn-in
وتكون مشكلة software !
اما بخصوص الضمان ف هو دة سامسونج مصر اللي كل المستخدمين بيشتكوا منه للأسف، مفيش خبرة كافية عندهم ولا في خدمة ما بعد البيع وعشان الموظف اللي في الفرع يقتنع ان المشكلة مش سوء استخدام لازم تعمل مشكلة معاهم وانت وحظك في الآخر، على حسب الفرع اللي بتروحه !!!

[ahmedazzam204]

حتي لو كانت مشكلة هاردوير ف انا غير مسؤول عنها و مش المفروض اني انا اللي اتحمل تكلفة التصليح خصوصا انه لسه في فترة الضمان
و كمان استبعد ان يكون السبب هو ثبات الشاشة علي الصورة الثابتة لأني بعمل ابديت بشكل مستمر لكل اجهزتي و مفيش اي مشاكل بتحصل دي مش اول مرة اعمل ابديت
اما بخصوص الضمان ف فعلا للاسف مفيش خبرة كافية و بحس انهم مش فاهمين المشكلة اصلا و عايزين يشيلوني التكلفة و خلاص حتي لو المشكلة من عندهم وانا طبعا مش هينفع ادفع المبلغ ده كله علي خطأ انا غير مسؤول عنه

[iPro]

انا مش قصدي ان دة العادي ان اول ما تعمل ابديت الشاشة يحصل فيها مشكلة، انا قصدي ان لو في عيب تصنيع في الشاشة ف ممكن من اقل استخدام زي ثبات الصورة لفترة مثلا يكون كافي انو يعمل المشاكل اللي حضرتك ذكرتها، ولو مشكلة هاردوير وخصوصا زي المشكلة دي ف المفروض دة يثبتلهم ان دة عيب تصنيع مش سوء استخدام لاكن زي ما قولتلك هي دي سامسونج مصر 🙄

[ahmedazzam204]

.

[RamyMagdi]

اعمل التحديث اللي بعدة والشريط هيتشال لوحدة ... علي فكرة كان عندي والحمد لله راح مع التحديث الجديد

[ahmedazzam204]

انا عامل كل التحديثات الموجودة حاليا
الشريط اللي كان عندك عامل ازاي معاك ليه صورة او فيديو؟