سوء وكاله سامسونج مع العملاء

[Abomnsor]

بسم الله الرحمن الرحيم 

السلام عليكم ورحمة الله وبركاته 

شريت جهاز S24 ultra بتاريخ 22_6 ميلادي من سوق الخالديه خميس مشيط بتاريخ وفاتوره الكترونيه معتمده

شغلت الجهاز بتاريخ 23_6 بعدها بيوم الجهاز جديد مقفل من المصنع فيتنامي ظهرت عندي مشكلة في الجهاز الكميرا الاماميه و الخلفيه تواصلت مع وكيل سامسونج ماطل فيني ثلاثه ايام بس عشان اشحن الجهاز لهم 

(( تم ابلاغي إذا ضهر عيب مصنعي في الجهاز خلال سبعه ايام من شراء الجهاز يتم استبداله مباشره))

قلت تمام انا متطمن حقي ان شاء الله ماهو ضايع 

وصل الجهاز عند الوكيل استغرق ثلاثه ايام اتصل علي موظف الصيانه قال عندك مشكلة في الهاردوير لازم نفك الجهاز ونصلح العطل قلت ابدا ما تفك الجهاز انا رافع طلب استبدال إذا تبين ان الجهاز فيه عيب مصنعي قال صحيح 

لكن الجهاز شغال له شهرين هذا الموضح لي تفاجأت الصراحه من كلامه وصلت لهذي الدرجه الاستهتار بل العملاء 

انا لي تجربة سابقة قبل ثلاث سنوات مع سامسونج سيئه جدا لكن توقعت ان الامر تحسن لكن للأسف لازال في انحدار تواصلت مع خدمة العملاء ردو علي قالو ليش ما تشتري الجهاز من سامسونج نفسه هذا عذر هل يعقل؟؟؟؟؟ 

انت وكيل وزعت على المحلات زيك زي اي وكيل يروج لمنتجه عشان يمشي بسوق تجي تقلي ليش ما شريت من المكان الفلاني 

عموما رفعت بلاغ على سامسونج بوزارة التجاره 

اليوم وبيتم ان شاء الله تحديث المنشور عند أي أجراء يتخذ

 هذا فقط تنويه عن خدمة عملاء سامسونج السيئه جدا 

واعتذر على الإطالة 🌹

[7bg]

عليكم السلام ورحمة الله وبركاته،
إذا كنت رافع بلاغ فإرفع بلاغ على المحل نفسه لأن حسب ما فهمته من كلامك أنه باع لك جوال مستخدم له شهرين على أنه جديد وقد يكون هذا سبب العيوب اللي ذكرتها....

الله يعوضك إن شاء الله في أسرع وقت ونصيحتي لك وليس تأييد للعذر السخيف لخدمة عملاء سامسونج بأنك تشتري الجهاز من الشركة نفسها أو من جرير أو stc. تضمن حقك كامل وتضمن أن الجهاز لم يتم التلاعب فيه مثل الشخص اللي باع لك الجوال وتكون أمورك طيبه بإذن الله تعالى.

[Abomnsor]

كلامك مقنع
لكن اتمنى احد يقنعني كيف الجهاز استخدم شهرين الجهاز انا فاكه بيدي جميع الاستكرات حقت المصنع مستحيل احد يفكه ويرجعه مثل تقفيلة الشركة

[Rayroxan]

الشركات الكبرى اذا لف ودار الوكيل يسحبون الوكاله ويشوفون غيره الا سامسونج مصممه على نفس الوكيل

من الإستحالة ان الجهاز من شهرين الا اذا هو ملخبط في الجهاز 

في شخص شاري فولد ووقف عن الطوي وأرسله لهم ارسلو له سوء استخدام بسبب خدش لا يرى بالعين المجرده وفوقها الخدش مكانه ماهو حتى حول مكان الطوي

ذكروني بوكيل سيارات جاله عميل يقول السيارة ماخذها وكاله قبل اسبوع بطاريتها فاضية ويسأله مسؤول الصيانه لبست السيارة ؟ يعني يدور اي عذر علشان مايقدم اي خدمه

كذا هو حال وكيل سامسونج وعلى فكره الضمان حقهم مايشمل اي شيء يتعلق بتجريح جسم الجهاز بمعنى لو في مشكلة بالشاشة او اي مكونات داخليه واضطرو يفكونه ماتقدر تقول لهم ليه في خدوش بالجهاز بعد التسليم 

[Abomnsor]

صحيح حسبنا الله ونعم الوكيل فيهم

[Abomnsor]

بعد البلاغ تم الاتصال علي من موظفين سامسونج وحاولو اقناعي ان الجهاز شغال من شهر 5 ميلادي وانه احتمال اشتغل داخل الكرتون شي مضحك الصراحه
لكن تم الاعتراض
وإحاله الموضوع للاداره المختصه وزارة التجاره

[Rayroxan]

اماااااااااا داخل الكرتون ؟ هههههههههههه 🤣🤣😂

والله لو قايلين عيب مصنعي كان ارحم بليون مره من هالعذر

اشتغل يعني الكرتون تم أختراقه بشيء قوي ولازم يدمر الكرتون والمفترض يسبب أضرار بالجهاز وتعال تخيل كيف ممكن يوصل هذا الشيء ويضغط فقط زر البور 

اللي اعرفه الوكيل له دخل يشيك الفاتوره والسيريل نمبر ويقول تمام وخلصنا 

واذا تبي الحق ؟ اخوي كان شغال في قطاع مثل كذا ويقسم بالله يقول المسؤول أجنبي يقول لنا لو يرجعه لكم بالكرتون مافتحه لا تستقبلوه ولا قسم بالله اخصمها من راتبك ومنها أستقال أخوي قبل كم سنه

فأحتمال انهم نفس الوضع لا تستبعد 

[Abomnsor]

الله لا يوفقهم طبعا تم ارسال تقرير من سامسونج ان الجهاز شغال من 5/4 ووزارة التجارة اقتنعت بتقرير وردو علي اني اشتكي على المحل طبعا رفعت شكوى على المحل والجهاز طلبت عليه صيانه وحسبي الله ونعم الوكيل فيهم جهاز باربعه الالف يكون مفكوك من اول يوم افقد ميزة مقاومه الماء و جهاز مفكوك الله لا يوفقهم لادنيا ولا آخره

[Rayroxan]

المفروض ماطلبت صيانته المفترض مرجعه للمحل وبناء على تقرير سامسونج بأن الجهاز مستعمل 

اذا الجهاز جديد جديد في تغليفته وكل شيء المفترض بناء على تقرير الصيانه بأنه في خلل مصعني ادى لعمله في الكرتون على قولته وهذا الشيء مايتحمله العميل يعني تخيل شريت الجهاز من سامسونج وظهر فيها هذا العيب هل بيقول والله الجهاز شغال من شهرين مالنا علاقة ؟ 

خلي شكواك على المحل لين يبدله لك

[Abomnsor]

تم رفع شكوى على المحل وننتضر الرد من الجه المختصه