Original topic:

سامسونج من مطب لدحديرة

(Topic created on: 05-14-2022 05:24 PM)
378 Views
besh
Active Level 4
Options
جالاكسى S
السلام عليكم و رحمة الله وبركاته
مساء الخير ع الشعب السامسونجي 🌼

هذا المنشور أقرب إلى الفضفضة و اعتقد ان كثير من محبين سامسونج يوافقوني بهذا الكلام 
بصراحة من لما سامسونج اصدروا جهاز الاس 21 و انا مصدومة انهم كيف فكروا يقلدون ابل بخصوص ازالة الشاحن من العلبة و قلت اكيد راح يعقلون و يرجعون لرشدهم وقت اصدار الاس 22 و لكن مافي فايدة بل بالعكس صارت اسعارهم مبالغ فيها جالسين يمشون ع نهج ابل + موضوع الشحن السريع الى الان ما اشوفهم تطوروا فيه انقهر لما اشوف شواحن الشركات الصينية مثل هواوي و ون بلس كلهم شواحنهم فعلا سريعه الجهاز ف نص ساعة يصير فل هذا غير أن نحن نعاني من مشكلة الحرارة من سنين و مافي تطور حقيقي أيضا بهذا الخصوص

انا الان أمتلك الاس 20 بلس و بطبعي كل سنتين ارقي الجوال يعني المفروض اني الان اشتري الاس 22 بس والله انها خيبة امل بسعره الحالي ما يقارب الاربع آلاف و الكرتون فاضي و ما تطور الجهاز كثير يعني صرنا بدل ما نرقي جالسين نرجع لورى يعني شالوا إمكانية زيادة حجم الذاكرة عن طريق تركيب ميموري كارد و هذي حركة جدا سيئة لانها كانت تميز سامسونج عن باقي الشركات... صار نظامهم ان خلينا نتبع القطيع

صرت افكر جديا اشوف لي شركة أخرى غير سامسونج مع اني من محبينها و استخدم جوالاتهم من النوت 2

انتظر ارائكم... 

17 Comments
جالاكسى S
جالكسي اس ٧ اصدارة قبل ٦ سنوات فطبيعي الشحن حقه يكون بطيء مو مثل الاجهزة الجديدة الي تدعم الشحن السريع
جالاكسى S
أنا أقول لك يا غالي
جالكسي اس ٧ اللي له ٦ سنوات
يشحن في نفس سرعة شحن جالكسي اس ٢٢ الترا اللي توه نازل

يا غالي ما فيه تطور في الشحن ابدا🙂😓
0 Likes
besh
Active Level 4
جالاكسى S
فعلا و الله كلامك ع الجرح!
انا الان جوالي اس ٢٠ بلس و نفس الشي عشان يشحن فل ياخذ ساعة و ١٠ د تقريبا هذا و هوو شاحن سريع ما ننكر ان البطارية كبيرة يعني اكبر من الاس ٧ لكن الشركات كلها تطورت بخصوص الشحن و ع رأسهم ون بلس جوالاتهم خلال نص ساعة تشحن فل

بصراحة بخصوص استهلاك البطارية اول ما اشتريت الجهاز كانت البطارية تخلص سريع سريع و كنت احسب انها مشكلة لكن بعد اول اسبوع الجوال بدأ يفهم طبيعة استخدامي و صارت البطارية ماشاء الله تجلس بالراحة ١٢ساعة يعني غالبا اشحنها ف اليوم مره وحده بس

لكن الشي الي زاعجني جدا هو الحرارة يسخن ع أشياء ما تسوى زي مثلا لما اتفرج فيديوهات لوقت طويل و السبب معروف انه من الاكسينوس و سامسونج عارفين لكن مدري ايش قلعتهم


0 Likes
besh
Active Level 4
جالاكسى S
ايش جوالك الي من ون بلس؟ و هل تنصحني أحول لهم او لا... انا اخاف من اي شركة ما يكون لها وكيل هنا ف السعودية + سمعت قبل فترة ان ون بلس صاروا يستخدمون نفس واجهة اوبو الي هي color os
اشوف ناس كثير من محبين ون بلس يحبونها بسبب oxygen os لانه شبيه بالاندرويد الخام و خفيف فماني عارفه بصراحة اذا احول لهم او اشوف هواوي؟!
0 Likes
جالاكسى S
أولاً : مسألة الوكيل اللي عندك أنت وش استفدت منه ؟! فيه شيء تحس أن الوكيل بوجوده قدمه؟ مثلا خدمات أو عروض أو إصلاح أو أي شيء ؟؟

اللي معي ون بلس 8t شريته أول ما نزل لكن ضروري إذا تبي تشتري جهاز من خارج السعودية تعرف وش هو الروم حقه
هل هو روم عالمي أو روم صيني أو روم هندي لأن الروم إذا اخترت مثلا صيني بيحبك الواجهة كلها تطبيقات صينية ويمكن ما يشتغل معك تردد الانترنت زين لكن ون بلس سهل جدا تركب تركب له الروم بنفسك
سبق وجربت وركب روم صيني اندرويد ١٢ ورجعت لاندرويد ١١ وتركته على ما هو عليه
أجهزة ون بلس خفيف صحيح بقوة وسلسلة وحلوة لكن أجهزة هواوي سبق وجربت هواوي ميت ٢٠ برو أول ما نزل بصراحة كان حجمه كبير وواجهته ما هي حلوة تسد نفسك لدرجة انه ما كمل معي فترة إلا بعته مع ان هواوي موجود وكيل لها
لكن الون بلس إذا تبي تشتريه شوف مراجعاته وإذا تبي تشتريه ضروري يكون أحد يعرف انتبه تشتري ويجيك روم ما هو عالمي وتتورط فيه
لكن من الأشياء اللي شفتها نقص لأني جربت ون بلس 8t هو كان ما فيه شحن لاسلكي ولكن الأجهزة مثلا ٨ برو فيه شحن لاسلكي وأيضاً واجهة سامسونج ترى فيها مميزات جدا حلو يعني لما تنتقل إلى ون بلس بتحصل جوال ما في واجهته مميزات أو حركات كثيرة
إذا أنت تحب الحركات أو المميزات الكثيرة يمكن ما يعجبك ون بلس لأن ما يستخدم حركات كثيرة
والشيء المهم اللي ودي اقول لك ان ون بلس كثيررر اللعب فيه وإذا الجو حلو مع ببجي على ٩٠ فريمات ما تحصل حرارة إلا خفيف
واللي يميزه انه لو يحتر وتحس في حرارته الفريمات ثابت ما راح تحصل فيه لاق مع الحرارة
وفي سؤال أسأله وآسف على الرد المتأخر لأن ما استخدم جوالي ذا كثير
besh
Active Level 4
جالاكسى S
بصراحة انا يهمني الوكيل يكون موجود عشان الضمان كل اجهزتي السابقة من سامسونج ما احتجت فيها الضمان لان سامسونج معروفه جودة تصنيعهم للاجهزة يعني اخاف اشتري ون بلس و اتورط يجيني فيه عيب مصنعي او اي خلل محد راح يضمنه لي + انا يهمني ان العتاد يكون قوي لاني ما اركب كڤر للجوال و جوالي يطيح كثير و مع سامسونج ما قد عانيت لا من كسر شاشة و لا غيره لكن ون بلس اخاف من اتفه طيحة ينكسر او شي لان مافي احد حولي اشترى منهم من قبل + يهمني كمان موضوع التحديثات هل التحديثات تتاخر مره او لا؟

انا الآن تقريبا شلت هواوي من راسي و صرت افكر ف شاومي... شفت جوالهم الجديد شاومي 12 برو تقريبا فيه كل شي ابيه و افضل شي ان الشاحن السريع ف العلبة و طبعا شاومي له وكيل عندنا فبصراحة انا في حيره شديدة ما بينه و بين ون بلس 10 برو


اعذرني على كثرة الاسئلة و شكرا لك اخوي
0 Likes
جالاكسى S
لا عادي أسأل
لكن ما دام أنك قلت يطيح الجوال منك كثير ولا تحب تركب كفر
فاتوقع ذي نقطة قوووية انك تترك ون بلس وتتوجه لشاومي لأن مثل ما قلت لها وكيل ولو صار شيء تتوجه الوكيل بعكس ون بلس بدون وكيل

لكن الون بلس تحديثات تمام لكن ما انصحك فيه إذا أنت ما تركب شاشة حامية ولا تركب كفر ليش؟

ليش ؟ ما هي سالفه عتاده ضعيف أو لا لكن قطع غيار ون بلس تبهذلك لو مثلا انكسرت الشاشة يمكن تدوخ ولا تحصل

وفي موضوع شاومي بما ان له وكيل فاتوقع ان قطع غيار متوفره( ما اني متأكد ياليت تسأل اصاحب شاومي وتتأكد منهم في موضوع القطع )

أنا من الأشخاص اللي ما يحب يمسك الجوال إلا بكفر وشاشة حامية
besh
Active Level 4
جالاكسى S
الف شكر لك ما قصرت