أنا ومن وجهة نظري المتواضعة إن بما إن التحديثات سواء الأمنية أو الترقيات متأخرة ومش شايف مبرر مقنع لتأخيرها بصراحة حيث إن كما يقال من قبل الموديراتورز إللي مش شايفين شغلهم على الإطلاق ده حاجة ده زائد إن مفيش عندهم غير القليل من المعلومات وكمان ومعلوماتهم ناقصة تحديث وعلى سبيل المثال لا الحصر إنهم مكانوش عارفين ميعاد نزول تحديث أندرويد ١١ ل a71 لحد وقت قريب وأي حاجة يقول لك عليها رجاء التأكد من تفعيل التحديث التلقائي إللي هو أصلا مفعل كده كده من وحضرتك بتشتري الموبايل الموديراتورز دول بيقولوا ان كل موبايل ليه جدول زمني في التحديث على حسب المنطقة طب الجدول ده بيتحط على أي أساس وليه مصر لازم تكون في أخر الجدول وليه التأخير ده كله ولو على إعتبار إن التأخير عشان النسخة تبقى مستقرة بدون مشاكل لا بتيجي مستقرة ولا بتيجي خالية من المشاكل وناس كتير بيحصل معاها مشاكل بعد التحديثات وكمان بيجي ناقص مميزات من المعلن عنها في المميزات إللي مكتوب إنها هتكون في التحديث سواء بقفلها عشان إحنا فقر او بزعم إنها غير متوافقة مع الجهاز
طيب لحد إمتى هنفضل كده لحد إمتى سوء خدمة في كل حاجة في خدمة بيع وما بعد البيع وحصل معايا امثلة كتير لده ولده بدون ذكر تفاصيل لأنها مواقف كتير جدا ولو قعدت احكي هاكتب جرنال
طيب هو يعني ده جزاء العميل إنه مش عاوز يغير لشركة تانية عشان إتعود على موبايل معين يمسكه ونظام معين يتعامل معاه
طيب هل الأجهزة إللي معانا دي واخدينها صدقة أو كسبناها في بنك الحظ
طيب ليه التأخير وليه المعاملة إللي زي القطران للعميل يشتري الجهاز وميطلعش فيه مشكلة ياخد في سنانه من تأخير تحديثات وقلة دعم طلع فيه مشكلة ياخد في سنانه من الصيانة هو لازم يبقى فيه حاجة مفلئة وياريت الجهاز بيبقى رخيص لا ده بيبقى غالي والصيانة كمان قطم وسط وكمان مفيش دعم والإكسسوارات التكة الجديدة عليك يعني يا وصلة شاحن يا سماعة إنت هتنهب مينفعش الاتنين
أنا من وجهة نظري إني هأكتفي بموبايلي إن شاء الله لمدة الدعم المتبقية له مش هأجدد ولا هأغير وقرف بقرف نستحمل القرف لحين إشعار أخر إما مزيد من الدعم والإهتمام أو غلو بغلو الواحد يشيل آيفون ويريح نفسه ع الأقل في دعم تقني وفني أحسن رغم ارتفاع السعر المبالغ فيه ولكن بتاخد خدمة نضيفة وده الفرق الجوهري بين سامسونج وأبل
نصيحة لو فضلت سامسونج مصر كده ع المدي القريب هتشطبوا لأن العملاء هيبتدوا يتسرسبوا واحد ورا التاني
على فكرة تحديثات الأمان دي المفروض انها بتسد ثغرات في النظام الثغرات دي ناس تانية بتبقى شغالة عليها عشان تخترق النظام يعني بتخترق هواتفنا من خلالها وبنبقى مشاع فبرافو عليكم إنتوا حاجة تشرف بجد
