يا جماعة للناس اللى معاها موبايل Galaxy A34 وحدثت لـ One UI 7 (اللى هو أندرويد 15) من يوم 12 يونيو، لازم تاخدوا بالكم من حاجة مهمة.
سامسونج يوم 17 يونيو وقفت التحديث وسحبته مؤقتًا من السيرفرات. التحديث نزل فعلاً وكان شغال، بس هما وقفوه بعد ما ظهر شوية مشاكل على أجهزة تانية زى الـ S24، زى مثلًا:
مشكلة بتخلى الموبايل ميفتحش كويس
تسريب فى الخصوصية داخل الـ Secure Folder
استنزاف فى البطارية وسخونة عالية
المشاكل دى مش شرط تظهر عند الكل، بس سامسونج وقفت التحديث احتياطى علشان تراجع وتصلح أى خلل.
لو انت من الناس اللى حدثت فعلاً والتحديث شغال معاك تمام، خليك مكمل عادى ومفيش مشكلة.
لكن لو لاحظت تهنيج، سخونة، أو الموبايل مش بيفتح كويس، يبقى الأحسن تعمل ضبط مصنع بعد ما تاخد نسخة احتياطية من بياناتك.
الناس اللى لسه موصلهاش التحديث، ده عادى لأن سامسونج وقفته وممكن يرجع تانى قريب بعد ما يتصلح.
تابعوا التحديثات من وقت للتانى من الإعدادات أو من تطبيق Samsung Members أول ما التحديث يرجع أو ينزل إصدار جديد منه.
