A24

[nourel-huda]

مساء الخير أنا جاية أتكلم فشيء مهم يخص الموبايل دا بعد ما قرأت كل منشوراتكم أو بوستاتكم عن تحديث الـ a24 

اه يا جماعة في لاجات أو bugs كتيرة جدا أولهم تلف فدايرة شحن البطارية، البطارية بتقل بسرعة، بيشحن فساعتين، في سخونة فالجهاز من فوق و تحت 

لو حد مركز ففي كمان سخونة ممكن تلسعلك ايدك حرفيا لو شديت الشاحن و شوفت الوصلة سخنة ازاي سواء من راس الشاحن او الوصلة اللي بتخش فموبايلك نفسها 

و اه رفض إستقبال الشاحن ال 24 واط الأصلي و وصلته كمان، مع ان الاتنين بيشحنو على اي سامسونج عادي جدا و رفضهم بشكل مفاجئ فعز ما بشحنه

جميل؟ 

هو في جمال اكتر من كدا ؟ 😂😂

قولت يا بت يا نور عادي عادي عادي روحي الفرع! فرع هو في أأمن من إنك تروحي فرعهم يعني مش بدل ما تروحي مكان و يقولك بصي يا ابلة شاكب راكب ٩٠٠ جنية؟؟ 

روحت الفرع، في ايه يا فندم؟ 

دا تلف فدايرة الشحن، اتفضلي غيري السوكت و هنفتح الموبايل، قولتله التليفون بيشحن على usb مش type c قاللي عادي يا فندم دي مشكلة بسيطة.

سلمت التليفون ٣ ايام و كنت قاعدة محتاسة، انا واحدة حياتي كلها عالموبايل يا جماعة بقيت بستلف موبايل اختي كل شوية لحد ما كانت هتديني على وشي😂

روحت استلمته و شحن ولكن برضو فساعتين! قولت عادي يا بت يا نور دا مكنش راضي يشحن خالص اصلا بالوصلة

التليفون معايا بقاله سنتين و نص و شحنه قبل الابديت كان ساعة و ١٠ دقايق ، حاليا بيشحن فساعتين وربع دا إذا مكنش اكتر 

الملخص المفيد ان اي حد هيروح الفرع ياريت يقدم شكوى او حتى تقدمو شكوى فالدعم لأن في ناس كتير راحت الفرع دفعت مبلغ و قدره وانا منهم و فالأخر تطلع مشكلة فالجهاز نفسه و فالتحديث نفسه و كلنا مأجمعين انها عالبطارية!! و مش هتكلم هي بتتشفط إزاي كنت بكتب و هو ٥٠% بقا ٤٠ فالمية مش ممكن بجد حاجة تقرف و التليفون بيسخن و ممكن السوكت يتلسع من كتر ما بشحن فالسخونة دي، حرام بجد الموبايل غالي عيب أوي اللي بيحصل دا! 

[thestriker7680]

النت غرقان بشكاوي ناس كتيرة عن كل حاجة في الموبايل بعد التحديث الجديد بمختلف الفئات ولا حياة لمن تنادي
الحل لحد دلوقتي يإما ترجعي ل one ui 6.1
أو تستنى التحديث الجديد one ui 8
والله أعلم هينزل لكل الأجهزة امتى

[nourel-huda]

ارجعه 6.1 ازاي بجد؟؟

[thestriker7680]

https://r2.community.samsung.com/t5/اخرى/عمل-سوفتوير-للهاتف/td-p/11518337?src=ShareByUserCM
دي طريقة عمل سوفت واختاري 6.1 مش أحدث حاجة زي ما بيقول
خدي بالك ان ده ممكن يعطل الضمان و التحديثات اللي هتحصلي عليها بعد كده

[nourel-huda]

طب و اللي معندهاش كومبيوتر تعمل ايه 🥲

[thestriker7680]

للأسف مفيش طريقة تانية 🥲

[nourel-huda]

يمراري يمرااري 😭😭

[nourel-huda]

ينفع لاب ؟؟

[thestriker7680]

لابتوب يعني؟

[nourel-huda]

اه