⚠️ خلل في نظام "مشاركة الطوارئ" بسامسونج.. رسائل الموقع لا تصل للطرف الثاني

[OsamaG]

يا جماعة، حابب أشارككم ملحوظة تقنية حرجة جداً تخص سلامتنا كمستخدمي سامسونج في مصر، وجربت الميزة دي على شبكتي فودافون واتصالات (e&).

المشكلة بالتحديد:

ميزة Emergency Sharing في سامسونج بتعتمد على إرسال رسالتين SMS من رقمك الشخصي:

1. الأولى: نص استغاثة "أنا بحاجة للمساعدة" (بتوصل عادي).
2. الثانية: رابط موقعك (Live Location Link) واللينك ده مش بيوصل نهائياً، ولا بيظهر حتى في الرسائل المزعجة (Spam) عند الطرف التاني.
   
   الطرف المرسل (موبايلي): تظهر الرسالة وكأنها خرجت بنجاح وبدون أي علامات خطأ.
   

   الطرف المستقبِل: رسالة الاستغاثة وصلت، لكن رسالة الرابط (Link) لم تصل نهائياً وكأنها لم تُرسل!

التحليل الفني:

يبدو إن فلاتر شركات المحمول بتحجب رسائل الـ SMS اللي فيها "روابط" لو مبعوتة من أرقام شخصية. وبما إن نظام سامسونج بيبعت اللينك مباشرة من شريحة الموبايل، فإن الشبكة بتمنع وصول الرسالة تماماً لـ المستقبِل.

نقطة قاتلة أخرى: الميزة دي بتفشل تماماً لو معندكش رصيد SMS، لأنها مش بتستخدم الإنترنت (Data) لإرسال الاستغاثة زي الأنظمة الحديثة.

المقارنة: لما جربت خدمة Google Personal Safety (على موبايل بيدعمها) على نفس الشبكات في مصر، اشتغلت بكفاءة واللينك وصل!

السبب؟ جوجل مابتبعتش اللينك من "رقم شخصي"؛ هي بتبعت الـ SMS من سيرفراتها الخاصة (Verified Sender).

صورة توضح نجاح وصول الرابط في خدمة Google Personal Safety على نفس الشبكة.

وللأسف، خدمة جوجل دي مش متاحة لينا على هواتف سامسونج، وده بيخلينا معتمدين كلياً على نظام سامسونج اللي حالياً "غير موثوق" بسبب طريقة إرسال الرابط.

الصادم في رد الدعم الفني:

لما بعت "Error Report" مفصل عبر تطبيق Samsung Members، كان الرد "نسخ ولصق" لنصائح بدائية زي (اعمل إعادة ضبط مصنع) أو (روح مركز الصيانة)! دي مشكلة "سوفتوير ولوجيك" في النظام نفسه ومحتاجة تحديث، مش مشكلة في الموبايل عشان يتصلح.

مقترحات لتطوير النظام:

نرجو تصعيد التقرير للمطورين لتحديث بروتوكول الطوارئ لضمان الموثوقية:

1. إرسال الرابط عن طريق سيرفرات سامسونج (Server-side SMS) لضمان تخطي فلاتر الحجب التي تفرضها الشبكات على الأرقام الشخصية.
2. إرسال إحداثيات الموقع النصية (GPS Coordinates) في رسالة نصية منفصلة تماماً عن رسالة الرابط، لأن النص المجرد لا يتم حجبه، مما يضمن وصول موقعك بدقة للطرف الثاني حتى لو تم حظر رسالة الرابط.

---

📢 نداء لكل الأعضاء: أرجو من الجميع تجربة الميزة دي دلوقتي مع أهلك أو أصحابك للتأكد من وصول اللينك. لو لقيت إنه مابيوصلش، ابعت Error Report فوراً من تطبيق Samsung Members بعنوان (Critical Safety Bug).

نتمنى من المشرفين تصعيد المنشور لقسم البرمجيات، إحنا بنتكلم عن ميزة أمان ممكن تنقذ حياة إنسان.

[دراغون]

انا بتكلم عن اي تقنيه جديده هتتضاف عموما من سامسونج بتتعلق بشركات الاتصالات ايا كانت سواء شبكه او غيره لازم يبقى في تعاون مشترك واجهزه مؤهله والكلام ده مع جوجل الكلام ده مش موجود لان جوجل اصلا قبل ما يكون في جوجل كانت جوجل مخلصه كل حاجه باتفاقيات جاهزه وده عالميا مش على مصر بس سامسونج بقى مش قادره تعمل الخطوه دي لانها اللي بتعمله هي طبقه فوق اندرويد انما مش جزء من النظام

[OsamaG]

الموضوع أبسط بكتير من فكرة "اتفاقيات جاهزة"

توضيحاً لنقاطك:

SMS Gateway:
أي شركة في العالم تقدر تشتري خدمة إرسال رسائل
Bulk SMS
وتوصل لأي موبايل في مصر بـ
Verified Sender ID
باسم الشركة. سامسونج بتعمل ده فعلياً حالياً لما بتبعت لك "كود تفعيل حساب سامسونج". فهل سامسونج محتاجة اتفاقية خاصة عشان تبعت كود الحساب، ومحتاجة اتفاقية تانية عشان تبعت رابط الطوارئ؟ طبعاً لا، هي نفس التقنية ونفس السيرفرات.

التناقض في الحلول:
لو افترضنا جدلاً صحة كلامك إن الخدمة محتاجة "اتفاقيات معقدة" وسامسونج مش قادرة تعملها، فده معناه إن فيه مشكلة واضحة في التخطيط عند سامسونج؛ كان الأفضل لهم دمج خدمة
Google Personal Safety
بشكل افتراضي طالما هي خدمة موثوقة وشغالة عالمياً، بدل ما يعملوا خدمة بديلة لا يعتمد عليها في وقت الخطر. وسامسونج عملت ده فعلاً في تطبيق الرسائل لما اعتمدت تطبيق
Google Messages
كالتطبيق الافتراضي وشبه وقفت تطوير تطبيقها الخاص.

الواقع التقني:
جوجل ببساطة بتستخدم الإنترنت عشان تبعت بياناتك لسيرفراتها
Cloud-to-SMS
والسيرفر هو اللي بيبعت الـ
SMS
للطرف التاني. بينما سامسونج بتجبر الموبايل يبعتها من الشريحة
Device-to-SMS
وهنا بتتحجب. سامسونج تقدر تعدل ده فوراً لأن عندها بالفعل البنية التحتية للسيرفرات دي، بدليل إن رسائل حساب سامسونج بتوصلنا عادي جداً.

الهدف من كلامي مش نقد سامسونج كشركة، بل المطالبة بتعديل "بروتوكول" الإرسال ليكون أكثر احترافية وموثوقية في حالات الطوارئ.

[دراغون]

انا فاهم وعارف اللي انت بتتكلم فيه ده كله ولكن ده الرد اللي هيطلع لك لو نقشت اي خبير تقني لان هم ما بيهتموش بالحاجات البسيطه دي وانت عارفه اقل حاجه هيعملوها هيدمجوا الخدمه اللي انت قلت عليها في النظام بدل ما يعملوا بدل ما يحدثوا البروتوكولات يا عم ده سامسونج الواي فاي كولينج ده المفروض ان هي تقنيه عامه يعني المفروض ان هي ما يحصلش فيها التهريج اللي كان بيحصل ده وحصل يعني انت عارف الموبايلات بتاعتها من اول اصدار معين اي او اس 17 تخيل انت معايا

[دراغون]

اتكلمت يعني عن ابل وقلت لك ان ابل صريحه من اول اي يو اس 17 لكن سامسونج في موبايلات من اندرويد 14 بتلاقي ايه داعمه عند الشركات وفي يعني في موبايلات عليها نفس الاندرويد في سامسونج هي هتشتغل عليه عادي من غير بقى ما يحطوا لنا نوع موبايلات معين وكلام من ده فهي سامسونج بتلجا لفكره الحلول البسيطه الحاجات اللي هي ايه ما تكلفهمش تلاقي دمج فعلي للخدمه في الموبايل من غير ما تلاقي بقى التحديث للبروتوكول اللي حضرتك بتتكلم عليه فهي سامسونج