لو شاري جهازك جديد ولسه معداش عليه 14 يوم او شهر
ف حابب اقولك الجهاز فيه مشكلة في التاتش
والمشكلة مجهولة السبب وغالبا مشكلة ف الشاشة مش سوفت وير بل مشكلة هاردوير ف الغالب
لأن نزل عدة تحديثات والمشكلة مازالت موجودة
هتقولي يعم جهازي زي الفل وسليم مفيهوش حاجة فال الله ولا فالك .. رد بمنتهي البساطة فيه ناس ظهرت لهم المشكلة بعد شهر كامل او اكتر شوية كمان
ففي النهاية انت حر عزيزي القارئ وما عليا إلا البلاغ
المهم نبدأ بالحالتين المحتملين
الحالة الأولي : الجهاز لم يتجاوز 14 يوم من تاريخ الشراء
في الحالة دي حقك كمستخدم ترجع الجهاز بدون إبداء سبب
ومش من حق المكان اللي اشتريته منه يعترض ويقولك مش هرجع .. دي قوانين حماية مستهلك وكله بيمشي عليها ورجله فوق رقبته هترجعه يعني هترجعه
الحالة التانية : الجهاز لم يتجاوز 30 يوم
الحالة دي اصعب شوية هتتطلب منك تصور مشكلة التاتش وتصور الإصدار اللي ع الموبايل والتاريخ معاهم
وتسلم الجهاز في مراكز الصيانة بتاعت سامسونج
وتكلم الشركة علي 16580 وتقولهم انك عاوز ترجع الموبايل وركز اوي ف ترجع دي عشان الشركة هتقولك يفندم نستبدل بجهاز غيره ودا فخ عشان تبدل ويمر عليك ٣٠ يوم وتلبس زي اخواتك
كام نقطة مهمين
- لازم يكون معاك فاتورة ضريبية او فاتورة سامسونج لو جايبه من موقع سامسونج ولو مش معاك روح اطلبها من المحل اللي اشتريته منه
- لازم يكون الجهاز مفيهوش خدش ويكون سليم 100 في الميه
- ارفض الإستبدال بشكل قاطع عشان هيعوزوا يلبسوك جهاز غيره هو هو بردو بس عشان يعدوا لك ال 30 يوم ومتعرفش تاخد فلوسك
- في اي حالة رفض من المحل او من سامسونج كلم جهاز حماية المستهلك وهيديهم علي دماغهم وهيخليهم يرجعوا الجهاز غصب عنهم
واخر حاجة كل دا يكون قبل ال 30 يوم لو عدوا انت لبست والجهاز معاك للأبد ومش هتعرف تعمل حاجة بعد ما يعدي الشهر
انا لبست ولله الحمد ف بحاول الحق الناس علي قد ما اقدر
صديقي انت رحت رجعت جهازك من حماية المستهلك ومحضرتش التحديث اصلا ولا شفت موجودة ولا لا .. انا بقي معايا الجهاز وبقولك المشكلة متحلتش وفر تعليقك لنفسك لو سمحت .. كنت نفعت نفسك ومرجعتش جهازك
