إلي سامسونج

[Kareeeeem]

الكل عارف إنه سامسونج بتغير الروم بتاعها طبقا لنوعية السوق إلي بتنزل الموبايل فيه يعني مثلا سوفتوير الهند غير مصر و الصين غير أمريكا و بيكون فيه إضافات مختلفة و حبة برامج جايز تفرق معاك أو جايز لا و اغلبها بيكون استخدامه تبع الدولة الي انت فيها لكن وبعد ما حدثت امبارح و شيلت شريحة الفون و دخلت علي متجر سامسونج أمريكا مش بس لقيت عروض تحزن الواحد لكن لقيت برامج مش متاحة لأي حد في العالم غير الأمريكان.

كتير مننا ميعرفش انه سامسونج نزلت برنامج تليفزيون زي أبل تي في بالظبط بل احسن بمراحل و مجانا و ده بس لامريكا و برنامج تاني زي نتفليكس حرفياً و مجانا و افلام و مسلسلات و قنوات و ده مخصوص لسامسونج أمريكا برده 

يعني مش كفاية برنامج جود لوك و الحصريات بتاعته و سامسونج باي الي مش شغال في مصر و العروض الي علي الكرديت كارد و تخفيضات ملهاش حصر لكن كمان تفرقة عنصرية بحتة لناس بتدفع اقل مننا بمراحل و ليها حاجات احنا لو عايزينها ندفع فلوس كمان فيها 

أنا مش فاهم لحد امتي التفرقة العنصرية البشعة لمستهليكن هما الي بيربحوا سامسونج و سوق منفتح تماما عليها و ولاء لكل منتجاتها. 

العالم اتطور و جايز ده ينفع في سنين فاتت لكن بعد كورونا و الي حصل في العالم ف سامسونج لو مش بطلت التفرقة و عممت كل منتجاتها سوا هاردوير او سوفت ف كتير مننا هيشوف منتج تاني و شركة تحترم العقل 

حالوا تجربوا متجر غير متجر مصر و هتشوفوا قد ايه احنا عالم سابع مش تالت بس بالنسبة ليهم. 

[AlyS]

ومتحطش شريحة في الموبايل ؟ تشتغل واي فاي ؟

[Kareeeeem]

VPN
ملوش علاقة بشريحة الموبايل
لو تقصد عشان تنزل البرامج الي اتكلمت عليها ف انت بتشيل شريحة الموبايل و تغير ال اي بي و تمسح الكاش و الداتا بتاع متجر سامسونج و بكده تقدر تدخل علي متجر أمريكا و تنزل اي شي
بعد كده تحط الشريحة و تشتغل عادي
في بعض الوقت هتحتاج عشان تشغل بعض البرامج انه ال اي بي يكون أمريكا لكن برده وقتها مش هتشيل الشريحة
الفكرة في انك تشيل الشريحة هو أنه متجر سامسونج أو نظام الاندرويد بشكل عام بيقرأ مكانك من الشريحة مش من عنوان ال اي بي بتاعك
الخلاصة
شيل الشريحة هو مرحلة مؤقتة لحد ما تنزل البرامج مش اكتر

[YoussefKhaled]

عايز انزل روم للموبايل a70
انزله ازاي واي احسن روم انزله

[Kareeeeem]

انا مش بفضل تغيير الروم لان لو مش حد فاهم كويس ف ممكن يكسر الضمان
و تغيير الروم مش هيفيدك بشكل عظيم زي ما متخيل
تقدر تغير متجر سامسونج عن طريق تغيير ال اي بي زي ما قولت فوق و تنزل برامج مش متاحة لينا
الروم الغير مصري فيها حاجات كتير مش هتشتغل في مصر ف شخصيا مش بفضل ده

[YoussefKhaled]

انا عايز انزل اندرويد 11
والفون انا جايبه من حوالي سنه ونص فأكيد الضمان خلص

[Kareeeeem]

لو الفون بتاعك هينزل له أندرويد ١١ يبقي يفضل انك تستني
لو هو قديم و عايز تنزل ١١ يبقي شوف موديل الفون ايه و نزل له الروم المناسب ليك
يعني موديل مصري ولا إماراتي ولا اوروبي حتي و بعدين نزل الروم المناسب ليك
عامة ابعد عن الصين لانه مش هيفيدك في اي شي و اعتقد اسيا بشكل عام

[YoussefKhaled]

انا تليفوني a70
والشركه تقريبا نسيت انها عملت a70

[YoussefKhaled]

انت غيرت روم قبل كدا ؟

[Kareeeeem]

لا الحقيقة مش غيرت روم لأني عمري ما احتجت اغيرها
أنا بفضل اشتري موبايل مش من مصر عشان دايما بيكون افضل
عامة موبايلك نزل له أندرويد ١١ بل هينزل له نفس الواجهة بتاعتي
اصبر أيام ان شاء الله و تلاقيها وصلتك فمش محتاج تلعب في اي حاجة
بل اعتقد موبايلك هيكون له أندرويد ١٢ لو مطبق عليه نظام التلات سنين بتاع سنين
عامة اطمن كلها ايام و يوصلك التحديث إن شاء الله

[YoussefKhaled]

ايام اي يسطا انت تعرف الجهاز ده مجالوش ابديت بقالو قد اي
+ الابديت لسه هينزل في شهر 5
ومش عارفين هيتاجل المعاد ده كمان ولا اي