على فكرة بدون مبالغة ، بس سامسونج ك شركة ام لو عايزة تحافظ على سمعتها ، فا لازم تفكر بشكل جدي فالوكلاء بتوعها فالدول العربية وخصوصاً في مصر.
سامسونج مصر من اسوأ الناس اللي تتعامل معاهم بشكل عام ومن كل النواحي ، من ناحية عروض من ناحية اسعار من ناحية pre-order من ناحية ضمانات ، وحت اتفه حاجة وهي ال software updates اللي بتتأخر بشكل عجيب وبتحرق الأعصاب ، بل وإنهم بيعملوا skip لتحديثات كتير.
الموظفين كفائتهم متدنية جداً وعديمين الخبرة 👎🏼👎🏼👎🏼 ولما تتواصل معاهم واتساب ردهم يا اما بيبقى رد آلي ، يا اما يقولك اتوجه لاقرب مركز صيانة (اللي هو طب انتو لازمتكم ايه من الاول ما اطلع على مركز الصيانة وخلاص).
ولما تتصل على خدمة العملاء ، نفس الشيء موظفين خبرتهم ضعيفة جداً لدرجة ان الموظف مبيبقاش عارف الفرق بين التحديثات الرئيسية والتحديثات الامنية.
انا فمرة اضطريت اتواصل معاهم لحد ما طلبت منهم يحولوني على رئيس التيم بتاع سامسونج واشتكيت ان التحديث الامني لشهر ٧ اتاخر جداً وقالتلي خلاص يفندم هبعت ايميل للشركة ونشوف المشكلة دي )وتاني يوم بعتو التحديث لكل الاجهزة) وده ان دل على شيء فا ده يدل على انهم نايمين فمية المخلل ، بل وانها بتقولي ان التحديثات الامنية فمصر maximum بتقعد شهرين (واللي هي تعتبر المدة اللي بياخدها اي تحديث عشان ينزل حرفياً).
ممكن اكون انا ببالغ وبطلب حاجات مش بيطلبوها ناس كتير ، ولكن ده يظل حقي اني اخد نفس التجربة اللي بياخدها مثلا الي بيشتري موبايل من امريكا او كوريا او حتى السعودية.
مش لاننا فمصر والبلد كل حاجة فيها مش مرفهة للناس ، يبقى حتى سامسونج مصر تدي تجربة مستخدم سيئة جداً كده.
