مساء الفل عليكم
في سؤال تم طرحه هنا عن تأثير خاصية ال Always On Display علي التليفون ولفت نظرى ان المعلومه اللي عند جزء من الناس مش هقول اغلبهم انه التأثير عبارة عن استهلاك اعلي للبطارية فقط فا حببت اوضح حاجه جايز تهم حد او تفيد حد .
لو فكرنا شوية في ألية او طريقة عمل الشاشه الاموليد هنلاقي ان مصدر اضائتها هو البيكسلات اللي فيها بعكس الشاشات اللي بتعتمد علي اضاءة كاملة تأتي من الخلفية .
الشاشة الاموليد كل بيكسل فيها هو اللي بيطلع ضوء في الجزء ده من الشاشه هو نفسه مصدر الضوء وعشان كده لما بتتقدم الشاشه الاموليد في العمر شويه بيكون فيها اجزاء معتمه مش مطلعه ضوء وعشان كده بنميزها بسهوله جدآ عن الجديده من نفس نوعها او فئتها وده بعكس انواع تانيه من الشاشات .
طبق المعلومه دي علي فكره ان يكون في جزء من الشاشة منور علي طول او بمعني اخر منور او شغال اكتر من باقي بيكسلات الشاشة زي في حالة الخاصية اللي بنتكلم عليها يبقي اكيد الجزء ده بيكسلاته هتكون عمرها الافتراضي اقصر و دا بديهي ودي بداية الاجزاء المعتمه اللي بتتكون في الشاشه .
طبعآ في ناس ما يفرقش معاها عمر الشاشه هيكون اد ايه وبكفائه عاليه ولا لأ قصاد الاستمتاع بالميزه بس في المقابل في ناس تانيه هتلاقي ان الاستغناء عن الميزه دي او ظبطها بطريقه اقل شوية او تشغيلها عند الحاجه فقط قصاد عمر واداء اطول وافضل هو مكسب ليهم وعليك الاختيار .
انا طبعآ مش بقول ان ده هيحصل علي المدي القربب من الاستخدام لكن هي نتيجه محسومه وحتميه للمدي البعيد وطبعآ اللي هيتحكم في موضوع المدي ده هو جودة المنتج المواد المصنوع منها يعني حد هيتأثر بعد ٦ شهور حد بعد سنه وهكذا ...
الموضوع ده مش بدعه ولا حاجه جديده ده مطروح للنقاش وعلي مستوي واسع و من فترة طويله في كثير من المواقع الشهيره وخاصتآ المهتم منهم بالشاشات واغلب المواقع اجمعت علي المذكور فوق ده ، والموضوع واصل لسامسونج والحقيقه او المؤسف انها اختارت للرد او للدفاع عن ميزتها رد مايع كده اكد للناس اكتر ان الخاصيه ليها فعلآ اضرار علي الشاشه .
سامسونج قالت في وصف الميزة دي انها لا تضر بالشاشه طالما يتم تحريك المعروض علي الشاشه بنسبه طفيفه مع الوقت وطبعآ ده معناه عند اللي فهم الكلام ان في ضرر لكن بيتم توزيعه علي نطاق اوسع شويه عشان يقلل زمن احتراق البيكسل يعني بالبلدي كده علي اد فهمي يعني بدل ما ٢٠ بيكسل مثلآ يتحرقوا بعد .... من الزمن تكون النتيجه ان ٤٠ يتحرقوا بعد ضعف الزمن ده .
مرفق صوره لكلام سامسونج
ومرفق برده عينه من اللي منشور عن الخاصيه دي
ومرفق عينه من اذاي تطول عمر شاشتك الاموليد من ضمنها اختيار كيبورد وخلفيات غامقه العمل علي تدوير الشاشه علي فترات عشان كل البيكسلات تشتغل بنفس النسبة او علي الاقل بنسب قريبه وغلق ال Always On Display
وكل واحد بقي ومزاجه 😀 .
