طول السنين إلى فاتت ، و أنا كنت دايما أسمع أن " التحديث لا يأتى بخير " على رأى واحد صاحبى ..
أنا شخصيا جهازى القديم لما نزل السوق أول مرة كان بأندرويد ٤.٤ كيتكات، لكن أنا أشتريته بأندرويد ٥.١ لوليبوب..
و الظريف فى الموضوع أن كان فيه مشكلة فى المؤثرات الصوتية فى تطبيق الموسيقى.. و الشركة معالجتش المشكلة دى فى و أى تحديث وصل للجهاز بما فيهم تحديث الأندرويد نفسه من ٥ ل ٦.. و الأظرف من كده أنى أكتشفت بعد ٣ سنين مثلا ولا حاجة إن العيب أصلا فى تطبيق الموسيقى الأساسي بتاع سامسونج إلى على التليفون من الأول ، و عرفت ده لما نزل تحديث ل Samsung music متاح لجهازى و نزلته و لاقيت المؤثرات شغالة عليه طبيعى !!! حاجة زى دى كان ممكن تتعالج بسهولة من أول ما ظهرت بأنهم يحدثو تطبيق الموسيقى على الجهاز نفسه فى تحديث أمنى ، لكن ده محصلش للأسف ..
من ضمن الحاجات برده ، إن مع أندرويد ٦ ، المثرات الصوتية على شاشة القفل بقت " مكتومة " و برده متعالجتش فى أى تحديث ؛ و مشكلة ظهرت فى الاهتزاز فى واجهة المستخدم .. و نفس الوضع برده ...
لكن من فترة لا بأس بها و أنا أسمع أن سامسونج أخدت إتجاه تحسين الدعم بعد البيع " التحديثات يعنى " ، و أنها مبقتش تتأخر فى إطلاق التحديثات ، و علاج المشاكل إلى بتظهر من وقت للتاني فى بعض التحديثات..
لكن للأسف... أتضح لى غير كده مع الجهاز الحالى S10 Lite..
فبعد ما أشتريت الجهاز بشهرين ، جالى تحديث كانت نتيجته إن القوائم المصغرة إلى بتظهر على التطبيقات عند اللمس مع الإستمرار ، بقت بتظهر بعيدة عن التطبيقات ، أو مش بتظهر على الشاشة خالص .. الكلام ده فى الوضع الأفقى .. و نفس الموضوع لقائمة جهات الاتصال فى اللوحات الجانبية ( لو على الشمال)
الحمد لله عالجو مشكلة القوائم فى التحديث إلى وراه .. لكن معالجوش مشكلة لوحة جهات الاتصال!!! مش عارف ليه !!
من أيام وصلنى تحديث شهر أبريل ، فقررت أنى أعمل إعادة ضبط المصنع، لأنى معملتش كده من ساعة ما نزل تحديث أندرويد ١١ ، خصوصا إن جالى بعدها تحديث الواجهة من one ui 3 ل one ui 3.1 و ده كان تحديث كبير مش صغير برده ..
و أتفاجئت بعد ما عملت إعادة ضبط المصنع ، إن Always on display بتنور و بتطفى لوحدها، و إن ال proximity sensor بينور و بيطفى على Always on display ورا بعض و دى حاجة مش المفروض تحصل و لا المفروض أن proximitysensorيشتغل أصلا على Alwaysondisplay .
و بشوية " دعبسة " فى الجهاز عرفت إن المشكلة دى بتحصل لو أنا مشغل Always on display و علامة البصمة فى وقت واحد .. يعنى لو مشغل البصمة لوحدها أو Always on display لوحدها بتشتغل طبيعى.. و المشكلة دى بتحصل فى حالة Always on display فى الوضع الرأسى بس ...
فكانت النتيجى أنى أضطريت ألغى الاتنين، لأن ببساطة مضمنش أنى أسيب حاجة فيهم شغالة فالجهاز يعلق بالمنظر ده و هو فى جيبى ولا بعيد عنى ..
حاجة تانية إن المؤثرات البصرية على شاشة القفل ( حركة الخلفيات على شاشة القفل بتحريك الجهاز يمين و شمال ) راحت برده ، أو بمعنى أصح لازم تدخل على الخلفيات و تختار خلفيات الجهاز عشان تشتغل، لكن لو عملت restart للجهاز ، بتروح و لازم ترجع تشغلها تانى .. !
حاولت أتواصل مع خدمة سامسونج لكن إلى رد عليا قالى أعمل ضبط المصنع، بالرغم من أنى قلت له أنى عملت ضبط المصنع قبل ما يقترح عليا هو .. فرجعت قلت له ، أنى قلت له أنى عملت ضبط المصنع و مصلحش حاجة ، فقالى أودى الجهاز التوكيل 😁 ..
طبعا هو ممكن حد يقولى ( يا عم دى حاجات هايفة و مش مستاهلة ) ، بس لو الوضع كده .. طب هما عاملين الحاجات دي ليه من الأول ، ضيف على كده ، و أنا متأكد أن فى ناس كتير هتتفق معايا لما أقول أن مجرد فكرة أنك شايل جهاز بقاله كم شهر معك و أنت عارف أن فيه مشكلة تديلك شعور مش حلو خالص، و تحس أن الجهاز بقاله كذا سنة معك ، الشعور الغبى بأنك شارى حاجة جديدة و بايظة فى نفس الوقت ..
و إذا كان الوضع كده ، طب أنا أضمن منين أن مفيش مشاكل فى النظام نفسه ( غير مرئية ) ، و أضمن منين أن حتى لو ده موجود يتعالج فى تحديث ...
أحد المعارف معه Galaxy Note 9 شاشته لونها أخضر ، و الطريقة الوحيدة إلى قدر بها يلغى القصة دى هو أنه يشغل Always on display عنده طول الوقت ..
و أصحاب " الخبرة " قالو له أن ده عيب شاشة، لكن أنا عملت بحث و عرفت ان إلى معهم الجهاز ده كتير منهم عانى من نفس المشكلة بعد تحديث أمنى فى شهر مارس ٢٠٢٠ ، و كله أستنى أن الموضوع يتعالج فى تحديث تانى لغاية ما الشركة بطلت تبعت تحديثات أصلا و مدة دعم الجهاز فى ال software أنتهت ، و برده المشكلة زى ما هى ، و دى مشكلة كبيرة مش صغيرة ..
أتمنى أن الشركة تهتم شوية بالمشاكل إلى زى كده ، و أنا مظنش إن علاج مشكلة من دول ممكن يوصل ل ٥٠٠ ميجا حتى ، يعنى من الآخر سهل عليهم إنهم يعالجو الكلام ده فى التحديثات الأمنية ...
و طبعا أنا عارف أن الكتابة هنا مش هتوصل لحاجة ، بس أهه ....
لو فى حد عنده أى مشكلة حتى لو عبيطة يكتبها هنا ... لعل و عسى حد من الناس إلى بيردو علينا يشوف الكلام ده و يبعت تقرير ولا أيا كان... أنا معرفش نظام الشغل عندهم ... بس يمكن حد ياخد باله
بص يا معلم يعجبني الشخص الي مركز في المشاكل مهما كانت صغيرة والصراحه في بعض المشاكل من الي انت ذكرتها عانيت منها مش كلها أنا كانت تجربتي مع galaxy s6 النسخه العاديه والصراحه بعد اما التحديثات وقفت اتنفخت كتير في كمية الفيروسات والbugs في النظام وده عرفني ان samsung دايما بتركز ع الأجهزة الجديده وبترمي الأجهزة القديمة ف الزباله وبتمهتمش بال software ع قد ما هي بتهتم ب الhardware والصراحه أنت فعليا عشان تقدر تستمع بتجربة استخدام جهاز samsung والbugs الي عندك تكون اقل لازم تشتري موبايل flagship والصراحه دلوقتي أنا شايف ان سامسونج بدأوا يصلحوا بعض الأخطاء الي عملوها زمان وشايف ان في تحسن حتى في جانب الموبايلات الmidrange وشكرا😁
أنا طول عمرى بحب سامسونج بشكل عام مش فى الموبايلات بس ... بس مبيعجبنيش أنهم معتمدين على " الإسم " و عارفين أن الناس كده كده هتشتري منتجاتهم ... فبعد ممكن يبقى عندهم عدم إهتمام ال Software و إصلاح مشاكله ( و دى نقطة من نقط قوة Apple مثلا ) .. و فعلا أنت معك حق ... هم فعلا بمجرد أنهم بينزلو موديل جديد ، ب " يقلبو " القديم ، و مش مهم يبقى فيه مشاكل ولا لأ .... تحس أنهم عاوزين تزهق منه و تشترى الجديد
