السلام عليكم ورحمة الله وبركاته
وصل امس جوالي الجديد جلاكسي زي فولد ٣
و بعد ٢٤ ساعة استخدام ، اليكم ملخص اولي للتجربة الجديدة:
اولا، سلم لي على البطارية ، عمرها من عمر البطاطا ،ما شاء الله ، جمس بتانكي يارس ، يعني امانة مع استخدام ٨٠% عالشاشة الخارجية بسبب عدم وجود وقت للعب بداعي العمل خلال اليوم ، البطارية بشكل متواصل الاقيها قريب النصف ، بين ٤٠ و ٦٠% ، كل ما سنحت فرصة تلاقيني اشبكه للشحن ..
ثانيا، حرارة ، بالبيت مع تكييف المنزل و اتعمدت اسيب الجوال و اتابع تلفزيون ، ارجع الاقيه لسه ماسك حرارة ، مو سخونة عالية ، بس يمسك حرارة مع الاستخدام و يطول الين يبرد ..مو قلت لكم جمس ..الا كابرس ..
ثالثا، الشاحن الوايرلس تريو اللي وصل هدية ، بطيى و خايس و يسخن الجوال بعد ، حطيت جنبه مروحة مكتب صغيرة usb عشان تبرد وقت الشحن ..الكفر المستخدن سيليكون و ممكن يكون مساهم لابقاء الجهاز دافئ الى ساخن نسبيا ، علما ان الكفر اصلي و من موقع سامسونج..
رابعا، الكفر ابو جراب قلم اللي جا مع الجهاز، بعته بسبب المراجعات الكثيرة اللي بهدلت الكفر بسبب سوء تصميمه عند القفل و الفتح .
خامسا، جرير ارسل لي سمارت تاغ الجيل الاول بدل بلاس اللي معلن مع البرومو و اللي منزلينه مجانا مع عرض الطلب المسبق و سجلت شكوى مع جرير و بانتظار ردهم للاستبدال بالجيل الثاني او بيننا التجارة ..الله يعين .
سادسا، الشاشة الداخلية ملمسها ممتاز ، اقرب للزجاج مع انها بلاستيك مقوى مقارنة بحماية شاشة الفولد ٢ الداخلية اللي تحسها كنها ربل و تمسك بالاصابع اكثر من الجديدة اللي تخلي اصابعك تزحلق و مرتاحة اكثر عالشاشة .
سابعا، الكمرا الجديدة تحت الشاشة ، ما عندي تعليق لأني ما استخدمتها الا لتجربتها و لاحظت انك اذا فتحت الكمرا تلاقي الصورة من جوال نوكيا عام ٢٠٠٣ ، بس اذا صورت النظام يستخدم تحسين للثورة و يعدلها رقميا بعد اخذ الصورة. (مرفق صورة للتوضيح )
وقفل الاثنين
