طبعآ احنا عارفين ان لما نعمل روت للهاتف بناخد مميزات اضافية غير متاحه في الاوضاع الطبيعية بس قصادها طبعآ الدنيا بتتبهدل وحاجات وتحديثات بتقف الي اخره ومن المنطلق ده احنا دايمآ بندور اذاي ناخد المميزات الاضافيه بتاعت الروت او المتاح منها بس من غير ما نكسر حماية الهاتف ونعمله الروت الفعلي .
في تطبيقات كتيره علي جوجل بلاي فعلآ مفيده بس مش بتشتغل غير بالروت بس في المقابل في منها جزء بيشتغل بشوية تحايل او تريكات ومنهم الأتي
تطبيق App Ops
وده بيخليك تتحكم في الاذونات الممنوحة لأي تطبيق بما فيهم تطبيقات النظام نفسه وقطعآ بيوفر تحكم في الاذونات اكتر بكتير من المتاح لينا حاليآ .
احنا بنفتح اذونات اي تطبيق بتلاقي حاجات بسيطه بس لو ضغط علي الثلاث نقاط وشوفت باقي الاذونات الممنوحه ومالناش تحكم فيها هتفهم قصدي اكتر .
انا مهتم بالتطبيق ده لاني بدور جاهدآ اذاي اقفل رسائل العروض المزعجه اللي بتيجي من شركات المحمول وتسيب الشاشة منورة لحد ما انت تضغط علي الغاء وده هيكون من خلال التحكم في اذونات زي فتح لوك الهاتف او فتح الشاشة ودول من الاذونات اللي غير متاح التحكم فيها بدون الاستعانة بالتطبيق ده مثلآ☝️ او اللي زيه وده السبب الاول اني ببحث ورا التطبيقات اللي من النوع ده .
تطبيق Ice Box
واضح من اسمه انه شبه التلاجه والحقيقه التطبيق ده حكاية لانه بيعمل حاجات كتير مفيده منها تجميد التطبيقات الغير مستخدمه طبعآ لتوفير البطارية والداتا ، لغاية كده عادي وممكن نوصله بالاوضاع المتعارف عليها لكن الجديد او اللي بيسهل الموضوع والاستخدام انك بتعمل ليسته بتجمع فيها تطبيقات بعينها وبضغطه كله يدخل الفريزر وبضغطه يطلع منه ، او تظبط ان بغلق الشاشة كل اللي في القايمة يتجمد وبفتح الشاشة كله يرجع طبيعي .النسخة المجانية بتاخد لحد ١٠ تطبيقات والنسخة المدفوعه ( ٤ دولار ) عدد غير محدود من التطبيقات .
حاجه كمان بينزل ليه زر في الستارة بحيث يسهل عليك لو عايز تجمد كله مره واحده في حالت البطارية مش سعفاك ولسه شويه علي ما تشحن زي كده
حاجه كمان ظريفه للامان التطبيق نفسه الفريزر اقصد ممكن تقفله بالبصمه والتطبيقات اللي في قايمة التجمد بيتم اخفائها تمامآ من الواجهة طول ما هي في فترت التجمد ومش بتلاقيها في قايمة التطبيقات المخفية العادية لازم تفتح الفريزر بالبصمه عشان يظهروا تاني يبقي اصبح انت قافل كل التطبيقات دي بالبصمة ودي حاجه ناس كتير مفتقداها في سوفتوير سامسونج بس طبعآ مع اختلاف النتيجه لانه مش غلق فقط ده غلق واخفاء وتجميد يعني مفيش اشعارات منهم الي اخره .
دلوقتي التطبيقين دول محتاحين روت عشان تاخد منهم اللي قلت عليه ده التركه او بديل الروت هو تطبيق اسمه
Shizuku
ده اللي بيضحك علي الاندرويد ويفتح جزء كبير من صلاحيات الروت بس من غير روت فعلي
الثلاث تطبيقات السابقة موجودين علي جوجل بلاي عادي يعني جوجل معترفه بيهم وانهم أمنين😉
الطريقة انك بتنزل الاول الشيزوكو وعن طريق اوامر ال adb
بالطرق الثلاثه المتوضحه قبل كده في كتير من منشوراتي بتخلي التطبيق يشتغل بالامر ده
وبعدين بتنزل التطبيقين التانيين ومن داخل الضبط ليهم بتسمحلهم بأستخدام الشيزوكو عشان يشتغلوا من غير روت
معلومة اخيرة مهمه : بعد كل ريستارت للهاتف الشيزوكو لازم يقوم يدوي عن طريق الامر☝️ وطبعآ الوضع ده هيحكم علينا اننا ما نعملش الريستارت غير لما نكون جنب الكمبيوتر
او
الاسهل انك تعمل اوامر ال adb من الهاتف نفسه اللي هو ال
Wireless debugging
كل اللي بتحتاجه تكون داخل علي واي فاي وتطبيق من الماركت يعملك ده
انا عن نفسي بستخدم التطبيق اللي في السكرين☝️ جنب الفريزر علي طولLADB ده بيفتحلك ال adb هوائي وتكتب الاوامر من هاتفك نفسه بس لازم واي فاي وسعره ٣ دولار .
ايه رأيكم في الكلام او في الفكرة بتاعت البحث ورا صلاحيات الروت ؟
