سامسونج بدأت بإصدار تحديث اندرويد 12 من قريب لموبايل A12 و المتوقع انه يوصل بشكل تدريجي علي حسب دولتك و مقدم الخدمة و علي حسب رقم إصدار الموبايل و العملية دي بتستمر لمدة شهر ( ممكن اقل او اكثر ) و لكن إن شاء الله هيوصلك التحديث بمجرد وصوله لمصر لان زي ما قولتلك هو بشكل تدريجي و فيه دول هيوصلها بعد مصر كمان
اما بخصوص ليه التحديث بدأ يتم إصداره في الفترة دي رغم ان اندرويد 12 اعلن عنه من السنة الماضية و وصل لمعظم هواتف سامسونج السبب ان فيه جدول زمني وضعته سامسونج علي مدار السنة بحيث كل شهر بيوصل التحديث لإصدارات محددة من موبايلات سامسونج و الشهر الي بعده بيوصل لموبايلات تانية و الأولوية بتكون للموبايلات الحديثة الي نزلت في 2021 ثم 2020 و هكذا و كذلك الأولوية علي حسب نوع موديل الموبايل بحيث ان موبايلات سلسلة S & NOTE & Z بتكون اول موبايلات بيوصلها التحديث و بعدها بقية الموديلات و هكذا
من خلال الجدول المحدد مسبقا من شهور و علي حسب ترتيب الأولويات موبايل A12 يعتبر من اواخر الموبايلات الي هيوصلها التحديث و ده السبب بكل صراحة بمعني ان الموبايل كان متوقع من شهور انه هيبدأ ينزله التحديث بشكل تدريجي من شهر تقريبا مع العلم معظم شركات اندرويد عندها نفس فكرة الجدول الزمني لنزول التحديثات و السبب ان عدد الأجهزة و الإصدارات كتير جدا بحيث ان اندرويد 12 متوقع انه يكون متوفر علي اكثر من 50 إصدار موبايل و تابلت من سامسونج فقط و صعب يتم تحديث مئات ملايين الأجهزة حوالين العالم في نفس الوقت و بالتالي لازم يكون فيه جدول زمني تدريجي
مساء الخير يا فندم مع حضرتك اميرة من سامسونج مصر بنشكرك جدا علي طرح سؤالك ونتمنى لحضرتك يوم سعيد فى البدايه بعتذر لحضرتك جدا عن المشكله اللى بتواجه بناءا علي استفسارك بالنسبة لتاخير تحديث السوفت وير يمكن تغيير جدول التحديث والنماذج المؤهلة إذا واجهتنا أية مشاكل من خلال المراجعة المستمرة. قد يتم إيقاف التحديث لفترة من الوقت حتى بعد التحديث الرسمي ، عند حدوث إصلاح لحالات الطوارئ. تاكد ان شركة سامسونج تعمل دايما علي تحسين و تطوير كفاءة الجهاز و دة اللي بيتم تحديثة في السوفت وير نستاذنك بتفعيل التحديث التلقائي و سوف يتم التحديث فور صدور اي تحديث لة ولو عند حضرتك أى استفسار أخر موجودين تحت أمر حضرتك وفى خدمتك فى أى وقت شكرا لحضرتك ولوقتك
يفضل انك تفعل التحديث التلقائي دائما لان فيه تحديثات امنية بتوصل للجهاز كل كام شهر إن شاء الله خلال الشهر الحالي او بالكثير الشهر القادم هيوصلك تحديث اندرويد 12
هو المفترض ان اندرويد 12 بيقدم تحسينات في الأداء و حلول للمشاكل و افضل من اندرويد 11 نأمل ان بعد انتظارك الطويل انه يعجبك و تستفاد من مميزاته الكثير و لو حصلت مشاكل في الأداء لقدر الله اكتب المشكلة و إن شاء الله هتلاقي الحل
