الموضة الجديدة السنة دى كانت ال Refresh rate ، دى الحاجة الجديدة الى مصنعى الهواتف الجولة كانو معتمدين عليها فى منافسة بعضهم ..
و للى مش فاهم يعنى إيه Refresh rate ، فالموضوع ببساطة شديدة هو المعدل الى بتتجدد به الصورة المعروضة على الشاشة ..
بمعنى ان الصورة الى حضرتك بتشوفها على الشاشة " أى شاشة مش فى الموبايلات بس " ، هى فى الأساس عبارة عن صور مختلفة ، بتعرض ورا بعض بسرعة عالية كافية إن عينك تشوفها صورة واحدة بتتحرك
و لو هنوضح الموضوع أكتر هنقول إن ال pixels بتضاء علشان تعرض صورة معينة ، و بعدين تنطفئ، و بعدين تضاء تانى عشان تعرض الصورة الى وراها ، و بعدين تنطفئ، و بعدين تضاء تانى عشان تعرض الصورة الى وراها و بعدين تنطفي،...... و هكذا
فلما ده بيكون بسرعة كافية ، حضرتك مش بتاخد بالك إن الشاشة بتنطفى، و لكن بشوف صورة واحدة بتحرك على الشاشة ...
إلى بيحصل إن ممكن تكون سرعة تجدد الصورة على الشاشة كافية صحيح إنك متشوفش اللحظة الى بتنطفى فيها الشاشة ، بس فى نفس الوقت مش كافية إنك تحس إن الصورة بتتحرك بنعمة أدامك ...فلما يكون فى مشهد المنظر بيتغير فيه بسرعة " زى إن الكاميرا بتابع الكرة و هى بتتحرك من لاعب للاعب فى ماتش كورة مثلا " هتلاقى إن الحاجات الىبتتحرك بسرعة ، زى أرض الملعب ، شكلها مزغلل و مش واضح ..
لما بيكون معدل " أو سرعة " تجدد الصورة على الشاشة عالية كفاية ، حضرتك بتحس إن ال " زغللة " دى قلت ، و إن التفاصيل الى بتتحرك بسرعة دى أوضح ..
طب ... من هنا نفهم إن ده هيبقى واضح أوى فى المشاهد السريعة زى ماتشات الكرة ، أو أفلام الأكشن مشاهد المطاردات مثلا ، أو فى الألعاب.
طب يا ترى إيه أهمية ده على الموبايل ؟!!!
لو هنتكلم عن حد مش بيتفرج على حاجة على الموبايل و لا بيلعب games ، هنقول إن فى ال scroll فى القوائم و فى التصفح هيبقى أنعم ، و الكتابة فيه اوضح ، و transition animations فيه هتبقى أنعم و أوضح ، فهيديلك تجربة إستخدام أفضل كتير من المعدلات الأقل " أو التقليدية بمعنى أصح "
طب فيه حاجة بقى زى ما عرفنا مزايا معدل التجدد السريع أو High Refresh rate لازم نعرف عيوبه ..
* معنى تجدد الصورة بمعدل أسرع معناه ببساطة إن الشاشة شغالة لمدة زمنية أطول " أيوة " ، و بالتالي إستهلاك أكبر للبطارية ..
إزاى ؟! ، لو هنقول إن حضرتك شغلت الشاشة لمدة دقيقة واحدة ، و الشاشة شغالة ب Refresh rate 60 Hz " frame rate أو يعنى 60 إطار فى الثانية ، ده معناه إن الشاشة إشتغلت و إنطفت فى الدقيقة دى بمعدل 60 إطار فى الثانية *60 ثانية يعنى 3600 إطار " أو صورة يعنى " فى الدقيقة "
لما يكون ال frame rate 120 Hz فده معناه إن الشاشة بتشتغل و تنطفئ فى الثانية الواحدة 120 مرة ، و بالتالي 7200 مرة فى الدقيقة... أعتقد كده مش محتاج توضيح أكتر ... ولا إيه !!
ده له معنى تانى كمان ، و هو إن إستهلاك الشاشة نفسها هيبقى أعلى بمعدل الضعف ، ... آه ما هى الشاشات بتستهلك برده و أحب أفكركم إن الشاشة ال OLED ألوانها بتتغير مع الإستخدام و عرضة أكبر من ال LCD لاحتراق البيكسل ..
الخلاصة، جميل إن يبقى الموبايل فى شاشة ب Refresh rate عالى و أنا شخصيا لو إستخدمت شاشة بمعدل التجديد ده هبقى مبسوط جدا ... بس هل ده فعلا مهم على موبايل .... أعتقد كل واحد ممكن يبقى له الإجابة ال تريحه و تناسبه
لو حضرتك بتلعب كتير أو بتتفرج على حاجات سريعة كتير ، هتبقى كويسة لو عندك استعداد إنك تضحى بجزء من شحن البطارية ، بخلاف ده ، على الرغم من إنه هيديك صورة أفضل فى التعامل مع الجهاز بشكل عام ، بس أعتقد أن البطارية هنا لها الأولوية طالما لموضوع هيبقى تصفح أكتر منه لعب و أفلام و ماتشات كورة
