من ساعة ما غيرت موبايلى من A5 إصدار 2015 ل S10 Lite و أنا ملاحظ إن كل ما أبعت رسالة ، ثمنها بيتسحب من الرصيد من مرتين لست مرات ، و طبعا الرسالة القصيرة بقت " قصيرة " فعلا ، فلو حد فاكر فيكم إن الرسالة زمان و قبل الأندرويد كانت ..... مش فاكر بصراحة 😁 بس كانت أكتر من ٣٠٠ حرف ، مع أول تليفون أندرويد إستخدمته لاقيت إن أول رسالة بعتها منه إتحسبت ب ٣ رسايل و عرفت من ساعتها إن عدد الحروف بقى أقل ، و لو حضرتك بتاعت رسالة لحد مش من نفس شبكة المحمول الى حضرتك مشترك فيها بتحسب ب ٥ وحدات ، فده معناه إن لو الجهاز بعت الرسالة أكتر من مرة زى ما بيحصل معايا بال S10 lite , فده معناه إن الرقم ده هيضاعف حسب حجمها و حسب هو بعتها كم مرة ،
عموما أنا عرفت إن دى مشكلة موجودة فى بلاد تانية و مع أجهزة تانية ، و هى حاجة فى ال 4G ، حسب الى فهمته إن لو التغطية مش جيدة الجهاز بيبعت الرسالة كذا مرة ، و الى بتبعتها له برده هيستقبلها كذا مرة و تمنها هيتسحب بعدد المرات
الحل المؤقت الى لاقيته لو حضرتك محتاج تبعت رسالة SMS " بعيد عن معظم الناس بتستخدم تطبيقات مجانية دلوقت المراسل. " كل الى عليك تعمله إنك تبدل الشبكة 2G او ل 3G و الرسالة هتتعبت بشكل طبيعى
لأ كانت أكتر من ١٦٠ ، كانت ٣٤٠ أو ٤٤٠ حاجة كتير كده ، و على فكرة أعتقد إنها لغاية دلوقت لو بحروف إنجليزي بتبقى أكتر من العربى برده ، مش عارف ايه العنصرية دى 😁 !
