أى حد يلاقي البطارية معه إستهلاكها زاد بعد تحديث نسخة الأندرويد ، متقلقش لأن ده طبيعى ..
النظام الجديد بعد ما بينزل بيبدأ فى إرسال و إستقبال بيانات معينة ، و شغال فى الخلفية ، و بشكل عام بيكون لسه مش مستقر فى أداؤه و بالتالي بيكون إستهلاكه للبطارية عالى شوية ، فبيكون محتاج يفصل متصل بالإنترنت يوم ولا الاتنين لغاية ما " يظبط " و ياخد الشكل " الطبيعى " له ..
بس أحيانا التحديث بيجيب معه مزايا معينة تستهلك بطارية أعلى زى مثلا ، مؤثرات بصرية جديدة ...
أو الطريقة إلى النظام نفسه شغال بها ..
و أحيانا بيجيب معه مشاكل ( مش شرط تكون حاجة ظاهرة أدامك ) ، بتكون سبب لأستهلاك البطارية برده ..
فمش شرط إن النظام الجديد يبقى إستهلاكه للبطارية أفضل ، صحيح إن المفروض النظام الجديد يكون شغال بكفاءة عن الأقدم ، لكن ده مش معناه إن أستهلاكه للبطارية أقل ، ممكن ببساطة يكون قادر إنه يستغل طاقة البطارية بكفاءة أعلى من القديم و بالتالي قادر أنه يعمل شغل أكتر من القديم بنفس الطاقة إلى بيحتاجها القديم أو بطاقة كانت هتبقى أكبر لو كان القديم هو بيعمل نفس المهام
كمان ممكن يكون يكون النظام متوافق مع معالج معين أكتر من غيره ، فتلاقى نفس النظام بيستهلك كهرباء أقل على معالج من إلى بيستهلكها على معالج تانى منافس ... مثلا
عموما إذا الجهاز فضل فى حالة إستهلاك غير طبيعية للبطارية بعد التحديث بيومين تلاتة ، ممكن تعمل إعادة ضبط المصنع ( بعد ما تاخد البيانات المهمة ) ، و أعمل تحديث لتطبيقاتك ( و ياريت متنزلش تطبيقات من بره متجر جوجل أو سامسونج و لا تنزل تطبيقات مجهولة أو غير ضرورية ) ، و تأكد أنك ظبطت كل الإعدادات ، و قفلت الحاجات إلى بتستهلك بطارية من غير داعى ( البحث عن الأجهزة القريبة مثلا طبعا فى حالة لو مش محتاجها ) و يسيب الموبايل يومين متصل بالإنترنت لغاية ما أداؤه يستقر بعد إعادة ضبط المصنع
المفروض تبدأ تعرف الإستهلاك الحقيقى للبطارية بعد التحديث الجديد
