إلى أعضاء سامسونج الجميلين 💙

[refah]

السلام عليكم

لاحظتوا إنا الآونه الأخيرة كل منشوراتنا حلطمه ونقد لسامسونج ونظامها.. طبعاً المقصد منها إنا ندور حلول ونفضفض لبعض مو قصدنا إن سامسونج سيئة أو نحرض الأعضاء إنهم يتركون سامسونج ويتجهون للشركات الثانية.. ترانا نستخدم أفضل الأجهزة من ناحية سهولة النظام والتصفح  والتحكم في الجهاز وأشياء ثانية كثيرة متوفرة عندنا ومو متوفرة في أجهزة الشركات المنافسة .. خلاصة الكلام إن لا تخلي أحد يغير رأيك ويكرهك في جهازك اللي تستخدمه 🌚🌚

اللي بينتقد ياويله وسواد ليله 🔪🔪

[〆almutairi〆]

هي المسأله مو مسألة اللي مو عاجبه يروح
طيب عادي نروح ونغير الموضوع بسيط

لكن انتقادنا من باب الإصلاح مستقبلا بإمكان اي شخص مننا يحذف الجوال ويأخذ غيره بدون مايتكلم ويوجع راسه لكن فيه ناس مو قادره تشري جوال بخمس آلاف استثمار لخمس سنوات وحراره ترى شي يقهر تلقاه يجمع من له سنه او سنتين فصعب عليه التغيير

لذلك المنتدى اذا صار بدون مجاملات تعرف ايش الجوال اللي ينفعك ويطول معك من الجوالات اللي بتسبب لك مشاكل


اما مسألة مو عاجبه يطلع فيه ناس مو انانيه ماعندها أشكال تطلع وتغير لكن سبق وقلت لك بعضهم صعب أن شرى جوال يشري الا بعد كم سنه وبعضهم أقساط فلما اجي امدح جهاز وهو فيه مشاكل حراره مثلا طيب ممكن فيه شخص يقرأ منشوري وطالما شخص مدحه شراه!!!!


الهدف عزيزي مو تفلسف شي جربناه وصار معنا
وكلامي ومنشوري كله ع اس 10 بلس ممكن غيري معه بدون مشاكل ويمشي معه زي الحلاوه

انا او غيري ينقل تجربته رغم ان جهازي تقريبا حول السنه بدون اي مشاكل حراره بعده بدت المعانات احيان اقعد انقل جوالي من يد ليد كل 5 دقايق!


حنا ماحنا معصومين من الخطأ او تقنيين لابعد درجة الخ حنا ننقل استخدامنا المتواضع خلال سنه فالموضوع يرجع لك

اما مسألة اني لازم اطبل للشركه مستحيل اطبل وفيه شي مو عاجبني بالعكس انتقد هالشي حتى بالمجالس لان فيه ناس تدفع فلوس يالله يسرها او أقساط فلازم يكون ع بينه بكل شي

[refah]

أنا مع الإنتقاد مافيه إشكاليه بس إذا كثرنا منه ونعبي رأس بعض وفي المقابل مانمدح الميزات ولا نذكر الخصائص اللي متوفرة في سامسونج ومو متوفرة في غيرها .. بنكره أجهزتنا ونحس إنا نستخدم شيء داعس ولازم نغيره 🌚🌚

[iK7]

بالنسبة لإنزعاجهم من المعالج اتوقع بينتهي مع التحديثات الجديدة للاندرويد 11 و الون يو اي 3.0

[refah]

ياليت والله 💔💔

[iK7]

اي نتفائل خير🙏♥️♥️

[refah]

لا معليك خالد أكثر عضو يتقبل الرأي والرأي الآخر وروحه رياضيه 💙

[〆almutairi〆]

@wwa لا بالعكس بس حبيت أوضح اني مو ضد الشركه والجوالات بالعكس من أفضل الجوالات اللي استخدمتها ولكن لما انتقدها انتقد على شي يأثر فعلا وانا من النوع اللي ما اتحمل الحراره نهائي في الاجهزه لذلك عندي اهم عيب حتى ولو حطوا لي مميزات كثيره

فالعتب ع قدر المحبه وانا اخوك وعندي رغبه اني استمر مع سامسونج لكن احيان تنجبر تغير بشي ماتحبه فالجهاز فقط

[〆almutairi〆]

من زمان مادخلنا نقاش مثل كذا

موضوع اهنيك بوقت الاختيار والتوقيت المناسب👍

[refah]

هههههههههههههههههههه أحب المشاكل أنا 🌚🌚

خلونا نرجع حبايب ونفتح صفحه جديدة 🌚

[〆almutairi〆]

نفتح صفحه جديده 😊😂

اما بخصوص سؤالك
يب بأطراف الأصابع واحيان امسكه مع الأطراف مدري كيف بشرح بس بصور عشان تاصل المعلومه 😂