دى مشكلة بتحصل فى أى شاشة أيا كانت التقنية المصنع على أساسها الشاشة ، و بعيد عن أى تفاصيل تقنية معقدة أنا شخصيا مش فاهمها كويس ،
الموضوع تلخيصه فى ظهور ظلال أو بمعنى أصح آثار صور معينة عليها ، فى الوقت الى ممكن تكون أنت عارض صورة تانية خالص ، و الظلال دى بتكون ثابتة. مش بتروح
بتوضيح بسيط ، نقدر نقول إن أى شاشة تتكون من pixels و إن كل pixel بتتكون من sub pixels ، و أشهر شكل لل sub pixels هما ثلاثة sub pixels ، أحمر ، أخضر ، و أزرق أو RGB تقدر ( للى عاوز يشوف الحكاية دى على الطبيعة ) تقرب من أى شاشة إعلانات فى الشارع لأنها كبيرة و تبص فيها كويس ، لو دققت. يستحسن فى جزء يكون أبيض من الصورة المعروض لكن ينفع مع أى لون تانى عادى، هتلاقى إن الأبيض ده عبارة عن إضاءات صغيرة جنب بعض من الألوان دى أحمر و أخضر و أزرق
( شاشات سامسونج ال AMOLED حاليا مكونة من ٤ sub pixels أحمر و ٢ أخضر و أزرق
الى بيحصل إن كل صورة بتشتغل ال sub pixels دى بطريقة معينة عشان تبان زى ما إحنا بنشوفها ، و طبيعى إن طول ما الصورة معروضة ال sub pixels دى بتفضل مضاءة
و لأن كل حاجة لها عمر إفتراضى، فإضاءة ال sub pixels ( و الشاشة كلها بطبيعة الحال ) بتقل مع الإستخدام
و طبيعى برده إن كل ما إضاءة ال sub pixels دى كانت أعلى كل ما كان إستهلاكها أو تآكلها أسرع .
إعمل بقى إضاءة عالية مع مدة عرض طويلة لنفس الصورة تكون النتيجة تآكل ال sub pixels بشكل الصورة المعروضة بسرعة ، و بفرق ملحوظ عن باقى أجزاء الشاشة ، و تكون النتيجة وجود ظلال للصورة دى حتى و هى مش موجودة ، بسبب " التآكل الكبير " لل sub pixels المكونة الصورة وقت ما كانت معروضة ، و هو ده إلى إحنا بنسميه إحتراق الشاشة أو إحتراق ال pixels
طب هل كل الشاشات زى بعض فى الموضوع ده ؟؟
لأ ...
الموضوع اساسا متوقف على التقنية المصنع بها الشاشة ، و ممكن جودة المواد المستخدمة و سرعة تآكلها ..
المشكلة دى عموما مش كبيرة فى شاشات ال LCD ..
لكن للأسف هى من أكبر مشاكل الشاشات OLED ، إلى منها شاشات معظم موبايلات سامسونج حاليا.
طب إزاى نتجنب إن ده بتحصل ؟؟
متعليش إضاءة الموبايل بدون داعى " أو حتى لو عندك تليفزيون OLED فى البيت ينطبق عليه نفس الكلام "
الأفضل إنك تسيب الموبايل أو التليفزيون هو الى يختار شدة الإضاءة المناسبة لإضافة المكان إلى حضرتك موجود فيه ، و حاول إنك تقللها شوية كمان إذا كنت قادر تشوف الصورة كويس على مستوى إضاءة أقل و عينيك مرتاحة ( للعلم الناس فاهمين إنه لما يعلى الإضاءة الألوان بتبقى أحلى لكن المعلومة دى غلط لأن فعليا الألوان بتبان أقل زهاء مع زيادة إضاءة الشاشة )
